Goa Monsoon Update 2023: गोव्यात 26 तारखेपर्यंत ऑरेंज अलर्ट जारी करण्यात आलेला आहे. मुसळधार पावसामुळे जनजीवन पूर्णपणे विस्कळीत झाले आहे.

ग्रामीण भागात पडझडीच्या घटना वाढल्या असून यामुळे जीवितहानीचा धोकाही वाढला आहे.

माहितीनुसार, आज सकाळी अशीच एक घटना कोठीवाडा येथे घडली आहे. कोठीवाडा-कारापूर येथे मंगळवारी पहाटे दोन घरांवर भलेमोठे फणसाचे झाड कोसळल्याची माहिती समोर आली आहे.

या घटनेत घरांसह दुचाकी आणि तुळशी वृंदावनाची मोडतोड झाली आहे. यामध्ये वित्तहानी वगळता अन्य कोणत्याही प्रकारची जीवितहानी झाली नाही. पावसामुळे होणाऱ्या या घटनांमुळे नागरिक हैराण झाले आहेत.

दरम्यान, काल अशीच एक घटना शिवोली येथे घडली. मार्ना-शिवोली येथे सोमवारी संध्याकाळी सरीता च्यारी यांच्या कौलारू घरावर भलेमोठे आंब्याचे झाड वादळी वाऱ्याने कोसळल्याने घरात शिकवणीसाठी आलेले चार विद्यार्थी अंगावर कौले पडल्याने जबर जखमी झाले.