Goa Monsoon Update 2023: गोव्यात 26 जुलैपर्यंत ऑरेंज अलर्ट जारी करण्यात आला आहे. मुसळधार पावसाने राज्यभरात थैमान घातले आहे. ठिकठिकाणी होणाऱ्या पडझडींमुळे नागरिक मात्र हैराण झाले आहेत.
मोटये बोरी येथे फणसाचे झाड उन्मळून दीपक प्रभुदेसाई यांच्या कारवर पडल्याने कारचे मोठ्या प्रमाणात नुकसान होऊन यामध्ये हजारोंची आर्थिक हानीही झाली आहे. दरम्यान, अग्नीशमक दलाचे जवान घटनास्थळी पोहोचले असून त्यांनी गाडीवर पडलेले झाड हटवले आहे.
दुसरीकडे, आज म्हापसामध्येही अशीच घटना घडली आहे. धुळेर-म्हापसा रोडवर कृषी विभागाच्या शेतातील एक भलेमोठे झाड रस्त्यावर कोसळल्याने काही काळ वाहतूक ठप्प झाली होती. आनंदी अपार्टमेंटजवळ सदर घटना घडली असून, यामध्ये विजेच्या तारांचेही मोठ्या प्रमाणात नुकसान झाले.
दरम्यान, यामुळे भागातील वीजपुरवठा खंडित झाला. संबंधित गोष्टीची माहिती मिळताच वीज विभागाचे अधिकारी आणि अग्निशमन दलाचे जवान घटनास्थळी दाखल झाले. रस्त्यावरून झाड हटवण्याचे आणि वीजपुरवठा सुरळीत करण्याचे काम सुरू आहे. सुदैवाने यामध्ये कोणतीही जीवितहानी झाली नाही.
मुसळधार पावसाने अविश्रांतपणे सुरू केलेल्या फटकेबाजीमुळे शनिवारी राज्यातील जनजीवन विस्कळीत झाले. सखल भागांत पाणी साचल्याने पूरजन्य स्थिती निर्माण झाली असून रात्रभर पावसाचा जोर असाच कायम राहिला तर नदीकाठच्या लोकवस्तीला धोका निर्माण होऊ शकतो.
अनेक ठिकाणी नदी-नाल्यांनी धोक्याची पातळी ओलांडली आहे. पडझड आणि नुकसानीचे सत्र सुरूच आहे. त्यातच हवामान खात्याने पुढील चार दिवस ऑरेंज अलर्ट जारी केल्यामुळे लोकांनी सावध राहणे गरजेचे आहे.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.