Goa MLA Salary Hike आमदारांना वाढीव भत्ते देण्याच्या सरकारच्या निर्णयाला विरोधी आमदारांनी जोरदार आक्षेप घेतला. गुरुवारी विधानसभेत विरोधी पक्षनेते युरी आलेमाव, आमदार विजय सरदेसाई, एल्टन डिकॉस्ता, वीरेश बोरकर आणि व्हेन्झी व्हिएगस यांनी जोरदार आक्षेप नोंदविले.

आमदार व्हेन्झी व्हिएगस म्हणाले की, पेट्रोलची मर्यादा वाढविण्याची काहीच गरज नाही. आमदारांना ज्या पद्धतीने भत्ते वाढवले आहेत, त्यावरून समाजात वेगळा संदेश गेला असून त्यावरून टीकाही होत आहे.

यावर मुख्यमंत्री सावंत म्हणाले की, वैद्यकीय खर्च तीन लाखांवरून पाच लाख केला आहे. वाहनांसाठी रक्कम वाढविली असली तरी त्यावर व्याज आकारले जाणार आहे.

आतापर्यंत केवळ पाच आमदारांनी वाहनांसाठी कर्ज घेतले आहे. घरासाठी यापूर्वी 30 लाख रुपये मिळत होते, ती रक्कम वाढवून ४५ लाखांवर नेली असली तरी त्या रकमेवरही व्याज आकारले जाणार आहे.

पर्रीकरांच्या आठवणी जाग्या

अशा पद्धतीने जी वाढ केली जाते, त्यावर सरकारने सविस्तर स्पष्टीकरण द्यायला हवे होते. यापूर्वी मनोहर पर्रीकर स्पष्टीकरण देत होते, याची आठवण आमदार सरदेसाई यांनी करून दिली. शिवाय आपण अशा कोणत्याही योजनेचा लाभ घेतला नसल्याचे विजय सरदेसाई यांनी सांगितले.