Goa Assembly Session: राज्य सरकारच्या गोदामांतून गहू आणि तांदूळ तस्करीच्या आरोपाखाली पाच जणांना गुन्हे शाखेने अटक केल्यानंतर २ महिने उलटून गेले आहेत. दरम्यान, त्यानंतरच्या काळात गोदामांतून गहू, तांदुळ तस्करीचे एखही प्रकरण समोर आलेले नाही अशी माहिती, राज्याचे नागरी पुरवठा मंत्री रवी नाईक यांनी विधानसभा सभागृहात दिली.

विधानसभेच्या चालू हिवाळी अधिवेशनादरम्यान आमदार विजय सरदेसाई (गोवा फॉरवर्ड पार्टी), कार्लुस फरेरा (काँग्रेस) आणि क्रुझ सिल्वा (आप) यांनी याबाबत प्रश्न उपस्थित केला होता. शिधापत्रिकाधारकांसाठी असलेल्या गहू व तांदळाच्या तस्करीची विभागाने काही चौकशी केली आहे का, असा प्रश्न विचारण्यात आला होता.

त्यावर उत्तर देताना नाईक म्हणाले की, विभागाकडे या प्रकरणाची कोणतीही तक्रार आलेली नाही. रेशनकार्डधारकांसाठी गहू व तांदूळ तस्करीची तक्रारच आलेली नसल्याने याबाबत काही प्रश्नच उद्भवत नाही. विभागातील सर्व गोदामांची तातडीने दुरुस्ती आणि नूतनीकरणाची गरज आहे. या गोदामांमध्ये योग्य कार्यालयीन जागा तयार करणे आवश्यक आहे. धरबांदोरा तालुक्यात अतिरिक्त एका गोदामासह सर्व गोदामाच्या छतांची दुरुस्ती करण्याची गरज असल्याचेही त्यांनी सांगितले.

गुन्हे शाखेने नोव्हेंबर 2022 मध्ये नागरी पुरवठा विभागाच्या गोदामातून तांदूळ आणि गव्हाच्या पिशव्यांची तस्करी केल्याप्रकरणी पाच जणांना अटक केली होती.