डिचोली: डिचोली तालुक्यातील मुळगाव आणि अडवलपाल पंचायतींच्या ग्रामसभेत पुन्हा एकदा खनिज विषय तापला. मुळगावच्या ग्रामसभेत लोकांचा खाणीला विरोध कायम असल्याचे दिसून आले तर अडवलपालच्या ग्रामसभेत खाण समर्थकांनी खाणीला समर्थन देत खाणीला दिलेली 'एनओसी' पंचायतीने मागे घेऊ नये, अशी मागणी केली.

मुळगावात ठराव

मुळगावात खाण व्यवसाय सुरू झाला असला, तरी त्याचा गावाला काहीच फायदा नाही उलट गावचे अस्तित्व धोक्यात आले आहे. सरकारसह खाण कंपनी गावचे प्रश्न सोडविण्याकडे दुर्लक्ष करीत आहे, असा आरोप मुळगाव ग्रामसभेत लोकांनी केला.

खाणप्रश्री ग्रामस्थांची सर्वसाधारण सभा घेवून खाण बंद करावी, असा ठराव माजी सरपंच तथा देवस्थानचे अध्यक्ष वसंत गाड यांनी ग्रामसमेत घेतला. आजच्या ग्रामसभेला जवळपास शंभर लोक उपस्थित होते.

'आम्हाला हवाय खाण व्यवसाय'

अडवलपाल पंचायतीच्या आज झालेल्या ग्रामसमेत ट्रकमालकांसह खाण व्यवसायावर अवलंबून असलेल्या लोकांनी खाणीला समर्थन दिले. "आम्हाला खाण व्यवसाय हवा आहे". खाण कंपनीला पंचायतीने दिलेली एनओसी मागे घेऊ नये, अशी मागणी ट्रकमालकांसह खाण समर्थक लोकांनी आजच्या ग्रामसमेत केली तसेच तसा ठरावही संमत केला. गाव सांभाळून खाण व्यवसाय करावा, अशी मागणी यावेळी खाण समर्थकांनी केली.