खण पिटांनी सांठोवन दवरिल्लें उदक धोक्याचे पातळे वयर

पिसुर्ले होंडा वाठारांतलो खण वेवसाय फाटलीं 10 वर्सां पुरायपणान बंद आशिल्ल्यान हांगाच्या खण पिटांनी सांठोवन दवरिल्लें उदक पंप करून भायर काडूंक ना. ताका लागून खणींतले उदक धोक्याचे पातळे वयर गेला. पावस सुरू जावचे पयलीं लेगीत कांय कडेन उदक गळटा अशें दिसून आयलां. देखून पावसांत उदकाची पातळी आनीक वाडपाची शक्यताय आशिल्ल्यान सकयल्या वाठारांतल्या गांवांक धोको निर्माण जावपाची शक्यताय आसा. हे खणींतल्यान उदक काडपाची म्हायती संबंदीत खण कंपन्यांक तशेंच सरकाराक फाटल्या पांच वर्सां सावन दिल्या. ह्या वाठारांत उदकाची पातळी चड आशिल्ल्यान पावसात भोंवतणच्या वाठारांतल्या लोकांक धोको आसा. देखून ह्या प्रकरणांत सरकारान बेगोबेग लक्ष घालचें अशें मागणी थळाव्यानी केल्या.

तीन दिसांत वट्ट 48 अधिकाऱ्यांच्यो बदल्यो

I.A.S अधिकारी मायकल डिसोझा तशेंच संजीव गडकार हांचे सयत 15 अधिकाऱ्यांच्यो बदल्यो केल्या उपरांत बुधवारा आनीक 31 अधिकाऱ्यांच्यो बदल्यो जाल्यात. तीन दिसांत वट्ट 48 अधिकाऱ्यांच्यो बदल्यो जाल्यात. शिक्षण संचालक भूषण सावयकार हांची बदली करतनाच शिक्षण खात्याचे उपसंचालक शैलेश जिंगडे हांचे कडेन शिक्षण संचालक पदाचो तात्पुरतो ताबो दिला. हाका लागून सध्या पुराय वेळ शिक्षण संचालकान नव्या मंत्र्यांच्या इत्से प्रमाण हे बदल जाल्ल्याची चर्चा आसा. I.A.S अधिकाऱ्यांसयत वरिश्ठ श्रेणी अधिकारी तशेंच कनिश्ठ श्रेणी अधिकाऱ्यांच्यो बदल्यो जाल्यात. मामलेदार तशेंच जिल्होधिकारी कार्यालयातले कर्मचारी आनी अधिकाऱ्यांच्यो बदल्यो जातल्यो, अशें महसूल मंत्री बाबूश मोंसेरात हांणी कांय दिस पयलीं सांगिल्ले.

मोपा विमानतळ लिंक रस्त्याच्या बांदकामा खातीर परवानगी

मोपा विमानतळ लिंक रस्त्याच्या बांदकामा खातीर उप रान-संरक्षकान परवानगी दिल्या. देखून काजी आनी आम्यां सयत शेखड्यांनी फळझाडा कातरून उडोवपाचे काम चालू आसा. मोपा विमानतळ पीडित शेंतकारांनी न्यायालयात धाव मारीत जोड रस्त्याचे काम आडोवपाची मागणी केल्ली. पुण राजकी फुडाऱ्यांचो हस्तक्षेप आनी हेर कारणाक लागून सुनावणी लांबणेर पडिल्ल्याचो आरोप शेंतकारांनी केला. शेंतकारांनी ह्या प्रकल्पाक खर विरोध केला. शेंतकारांच्यो जमनी ताब्यात घेवपाचो हो प्रकार आमका मान्य ना. कोणूच आमचे म्हण्णे आयकून घेना. सरकारी अधिकारी आमचो छळ करतात, अशें थळावे शेंतकार सांगतात.

वाठादेव-सर्वण हांगा जाल्लो बायलेचो खून घोवानुच केल्ल्याचें स्पष्ट

वाठादेव-सर्वण हांगा जाल्लो बायलेचो खून तीच्या घोवानुच केल्ल्याचें स्पष्ट जाला. दिवचल पुलिशेन अटक केल्ल्या दुबावीत घोवान आपणे खून केल्ल्याची कबुलीय दिल्या. खुनाची ही घडणूक फाटल्या शुक्रारा उक्ताडार आयील्ली. बळीरामकुमार महातो हाणे बायल शोभा देवी हीचो खून केला. दुवावीत आरोपीक सोरो पिवपाची संवय आशिल्ली. घोवा-बायलेमदी अदीमदी झगडी जाताली अशी म्हायती मेळळ्या. मजगती, दुबावीत आरोपीक दिवचलच्या न्यायाल्यान स दिसांची पोलिस कस्टडी दिल्या जाल्यार आरोपी वांगडा आशिल्ल्या चली भुरग्याक पुलिशेन ताब्यात घेवन ताची मेरशेच्या अपना घरात रवानगी केल्या अशी म्हायती पुलीस निरीक्षक सुरज गावसान दिली.

कसिनोवयलो जीएसटी 18 टक्क्या वयल्यान 28 टक्के

कसिनो, रेसकोर्स, ऑनलायन गेमिंग हाचे वयलो GST 18 टक्क्या वयल्यान 28 टक्के वाडोवची अशी मागणी गोंय तशेंच हेर काय राज्यांनी केल्ली. हे विंशी जीएसटी COUNCIL'आच्या मंत्रीगटान परवानगी दिल्या. जीएसटी परीशदेंत हे विंशी निर्णयुय जाला. हे खातीर आता कॅसिनोच्या माध्यमांतल्यान चड कर मेळटलो अशी म्हायती मेळ्या. दिल्लींत जाल्ल्या मंत्रिमंडळाच्या बसकेंत ह्या विशयाचेंर चर्चा जाली. जाल्यार भारतांत सध्या 950 (साडेणवशें) परस चड गेमिंग प्लॅटफोर्म आसा अशी म्हायती ह्या बसके वेळार मेळ्या.