Goa Taxi : राज्यातील बेरोजगार युवकांना रोजगाराची संधी उपलब्ध करून देण्यासाठी युवा उद्योजक अथवा वाहतूक उद्योजक योजना लवकरच सरकारतर्फे उपलब्ध करण्यात येणार असल्याची माहिती वाहतूकमंत्री माविन गुदिन्हो यांनी दिली.

लवकरच मुख्यमंत्र्यांच्या हस्ते या योजनेचे उद्‍घाटन केले जाईल. या टॅक्सी ॲप सेवेसाठी गोवा माईल्स युवकांना स्वतःचे भांडवल वापरून टॅक्सी उपलब्ध करून देणार आहे. ही योजना ॲप आधारित आहे. त्यामुळे अनेक बेरोजगार युवकांना रोजगाराच्या संधी उपलब्ध होतील, असे मंत्री गुदिन्हो यांनी सांगितले.

या योजनेद्वारे गोवा माईल्सकडून युवकांना अगदी एक रुपयाची गुंतवणूक न करता टॅक्सी सेवा सुरू करण्यासाठी मदत केली जाणार आहे. या योजनेत टॅक्सी चालवण्याचा बॅजचीही सक्ती नाही तसेच त्यांच्याकडे वाहन चालवण्याचा परवाना असावा, असेही नाही.

टॅक्सी घेण्यासाठी सुरुवातीची रक्कम गोवा माईल्सच जमा करणार आहे. व्यवसाय व्यवस्थित सुरू झाला की गोवा माईल्स ही सुरुवातीची रक्कम तसेच गाडीचा हप्ता हळूहळू त्यातून वजा करून घेईल.