Goa Medical College: गोवा वैद्यकीय महाविद्यालय इस्पितळातील महिला कर्मचाऱ्याशी गैरवर्तन केल्याप्रकरणी बहुउद्देशीय कर्मचारी (एमटीएस) सुमेश होबळे याला निलंबित करण्याचा आदेश आरोग्यमंत्री विश्वजीत राणे यांनी दिला आहे.

गोमेकॉचे अधिष्ठाता डॉ. शिवानंद बांदेकर यांच्या नेतृत्वाखाली याविषयी अंतर्गत चौकशी सुरू करण्यात आली आहे.

या चौकशीत तो दोषी आढळला, तर त्याला सेवेतून बडतर्फ केले जाईल, असे राणे यांनी ट्विटरवर म्हटले आहे.

याआधी फोंडा इस्पितळातील एका डॉक्टरला रुग्णांच्या तक्रारीत तथ्य आढळल्याने बडतर्फ करण्यात आले आहे, तर दंत वैद्यकीय महाविद्यालयातील दोन परिचारिकांना निलंबित करण्यात आले आहे.

आरोग्य सेवेत शिस्त आणण्याचा प्रयत्न राणे यांनी चालवला आहे. त्यासाठी ते अचानकपणे इस्पितळांना भेटी देऊन पाहणी करतात.