Goa Medical College: आरोग्यमंत्री विश्वजीत राणे यांनी आज गोमेकॉच्या सुपर स्पेशालिटी विभागाला भेट देत थेट रुग्णांशी संवाद साधत तेथील स्थिती जाणून घेतली. या विभागातील सेवांचा आढावा त्यांनी या भेटीदरम्यान घेतला.

या भेटीवेळी त्यांच्यासोबत गोमेकॉचे अधिष्ठाता डॉ. शिवानंद बांदेकर, डॉ. अजित नगर्सेकर, डॉ. मधूमोहन प्रभुदेसाई होते. रुग्णांचा आजार, त्यावर चाललेले उपचार, तेथील उपलब्ध मनुष्यबळ या साऱ्याचा आढावा त्यांनी घेतला.

असे करतानाच त्यांनी रुग्णांना योग्य सेवा मिळते की नाही हे त्यांच्याशी संवाद साधत जाणून घेतले. परिचारिकांची कामे कशी वाटून दिली जातात, त्यात कोणती सुधारणा करता येईल याविषयीही त्यांनी मार्गदर्शन केले.

रुग्णांना पौष्टिक अन्न घटक मिळणे जरुरीचे असल्याने आरोग्यमंत्र्यांनी अन्नपदार्थ पुरवठादार कंपनी सोडेक्सोच्या अधिकाऱ्यांसोबतही गोमेकॉत बैठक घेतली. या क्षेत्रात कुठे सुधारणेस वाव आहे आणि त्यासाठी काय करावे लागेल याची माहिती त्यांनी संकलित केली आहे.