Goa GMC Mobile Theft Case

तिसवाडी: ड्रग्स खरेदी करण्यासाठी पैसे मिळावेत, म्हणून गोवा वैद्यकीय महाविद्यालयातील रुग्ण आणि त्यांच्या नातेवाईकांचे मोबाईल चोरी करणाऱ्या माविन फर्नांडिस याला अटक करण्यात आली आहे.

हा धक्कादायक प्रकार सीसीटीव्ही कॅमेऱ्यातही कैद झाला असून तो समाजमाध्यमावर झळकत आहे. चिंचणी येथील माविन फर्नांडिस याच्याकडून आगशी पोलिसांनी तब्बल दहा मोबाईल जप्त केले. ड्रग्ज व्यसनासाठी ही चोरी केल्याचे त्याने पोलिसांना सांगितले.

राज्यात मोबाईल फोन चोरीच्या घटना वाढल्यानंतर पोलिसांकडून तपास सुरू होता. सीसीटीव्ही कॅमेरा फुटेज तपासून बघितल्यानंतर माविन हा रुग्णांच्या नातेवाईकांकडून मोबाईल चोरत असल्याचे लक्षात आल्यानंतर पोलिसांनी त्याला अटक केली. आपल्या सहकाऱ्याबरोबर तो चोरी केलेले फोन मजुरांना विक्री करत असल्याचे पोलिसांनी सांगितले.

१५ गुन्हे नोंद!

माविनच्या विरोधात यापूर्वी १५ गुन्हे नोंद असून त्याला गुन्हेगारी पार्श्वभूमी आहे. या प्रकरणी पोलिस अधिक तपास करीत असून त्याच्याकडून इतरही माहिती उपलब्ध होऊ शकते, असे पोलिसांनी सांगितले.