पणजी: गोवा वैद्यकीय महाविद्यालयात (गोमेकॉ) इंटर्नशिप करणारी गौरी नारायण (२३, मूळ केरळ) हिच्या संशयास्पद मृत्युप्रकरणाला नवे वळण मिळाले आहे. प्राथमिक तपासात ती काही काळापासून ‘जेनेटिक डिप्रेशन’ (आनुवंशिक नैराश्य) या मानसिक आजाराशी झुंज देत असल्याची माहिती समोर आली आहे.

दोनापावला येथील हवाई समुद्र परिसरात या डॉक्‍टर महिलेचा मृतदेह काल बुधवारी आढळला होता. तपासादरम्यान तिच्या हातावर इंजेक्शनच्या खुणा व घटनास्थळी अनेस्थेसिया औषधाची बाटली सापडली. याच आधारे प्राथमिक स्वरूपात आत्महत्येचा संशय व्यक्त केला जात आहे. तथापि, अधिकृत निष्कर्ष अद्याप स्पष्ट झालेला नाही.

शवविच्छेदन अहवालात ‘नथिंग सिग्निफिकंट’ असा निष्कर्ष नोंदवण्यात आला असून, मृत्यूचे नेमके कारण स्पष्ट झालेले नाही. त्यामुळे प्रकरण अधिक गुंतागुंतीचे बनले आहे. मृतदेहातील नमुने जतन करून ते पुढील तपासासाठी टॉक्सिकोलॉजी (विष तपासणी) आणि हिस्टोपॅथॉलॉजी (सूक्ष्म पेशी तपासणी) चाचण्यांसाठी पाठवण्यात आले आहेत. या अहवालांनंतरच मृत्यूचे कारण निश्चित होण्याची शक्यता आहे.

गोमेकॉचे वैद्यकीय अधीक्षक डॉ. राजेश पाटील यांनी संबंधित औषधे अत्यंत नियंत्रित स्वरूपाची असल्याचे स्पष्ट केले. तर, आरोग्यमंत्री विश्वजीत राणे यांनी या घटनेची गंभीर दखल घेत सखोल चौकशीचे आदेश दिले आहेत.

दरम्यान, केरळहून आलेल्‍या गौरीच्‍या पालकांना या घटनेमुळे प्रचंड मानसिक धक्का बसला आहे.

तपासातील मुद्दे

‘जेनेटिक डिप्रेशन’चा मानसिक तणाव, हातावर इंजेक्शनच्या खुणा, घटनास्थळी सापडली अनेस्थेसिया औषधाची बाटली, पूर्वी आत्महत्येचा प्रयत्न झाल्याचा संशय, महाविद्यालयाकडून करण्यात आले होते समुपदेशन.