मडगाव: विवाहाच्या डेकोरेशन खर्चासाठी कर्ज घेण्यासाठी एका २६ वर्षीय युवतीने ऑनलाइन प्रक्रियेचा आधार घेतला खरा, मात्र हा प्रयत्न तिला भलताच महागात पडला. कर्ज तर मिळालेच नाहीच, उलट सायबर भामट्याने तिच्या बँक खात्यातील १ लाख ५१ हजार ८२० रुपये उकळले.

फसवणूक झालेल्या या युवतीने नंतर याबाबत सायबर क्राईम पोलिसांकडे तक्रार दाखल केली होती. तेथून ही तक्रार आता मायणा-कुडतरी पोलिस ठाण्यात वर्ग करण्यात आली आहे.

पोलिसांनी भारतीय न्याय संहितेच्या ३१८ (४) कलमाखाली हे प्रकरण नोंदवून घेतले आहे. पोलिस निरीक्षक कपिल नायक यांच्या मार्गदर्शनाखाली उपनिरीक्षक आशुतोष नाईक पुढील तपास करीत आहेत.

असा घातला गंडा

मायणा-कुडतरी पोलिस ठाण्याच्या हद्दीत राहणाऱ्या मलिहा शेख या युवतीला हा गंडा बसला. पोलिसांनी दिलेल्या माहितीनुसार तिचा विवाह निश्चित झाला होता. डेकोरेशनसाठी काही रक्कम आवश्यक असल्याने तिने ऑनलाइन कर्जाच्या कॅश बॉस व रुपेली या दोन साईट्स उघडल्या.

यावेळी एका व्यक्तीने तिला या साईट्सवर संपर्क साधून कर्ज देण्याचे आश्वासन दिले व तिचा बँक खात्याचा क्रमांक तसेच अन्य माहिती जाणून घेतली. त्यानंतर त्याने १ लाख ४८ हजार ४० रुपये तिच्या बँक खात्यात जमा केल्याचे भासवले.

त्यानंतर त्वरित ती रक्कम परत काढून घेत, तक्रारदाराच्या खात्यातील १ लाख ५१ हजार ८२० रुपये उकळले. आपण फसवणूक झाल्याचे लक्षात आल्यानंतर शेख हिने पोलिसात तक्रार दाखल केली.