साखळी : श्रावण मास सुरू झाला आहे. या महिन्‍यापासून हिंदू धर्मीयांचे महत्त्‍वाचे सण-उत्सव सुरू होतात. या महिन्‍यात तसेच गुढीपाडवा, गणेशोत्सव, दीपावली, दसरा आदी सर्व सणासुदींना झेंडूच्या फुलांचा (Marigold Flowers) जास्त वापर होतो. देवदेवतांना सजवण्यासाठी मंदिरात किंवा घरोघरीही झेंडूंच्या फुलांची जास्त मागणी असते. त्यामुळे सण-उत्‍सवांच्‍या काळात झेंडूंच्या फुलांचा व्यापार वाढलेला असतो. राज्‍यात मागणी जास्‍त व पुरवठा कमी अशी परिस्‍थिती असल्‍याने या काळात झेंडूंच्या फुलांचा दरही सर्वसामान्यांच्या आवाक्याबाहेरच दिसून येतो. या पार्श्वभूमीवर साखळी येथील कृषी कार्यालयाने (Agriculture Office Sakhali Goa) साखळी व ग्रामीण भागातील लोकांसाठी झेंडूंच्या फुलांचे उत्‍पादन वाढवण्‍यासाठी खास योजना आखून लागवडीसाठी प्रोत्साहन देण्याचे ठरवले आहे.

साखळी येथील कृषी कार्यालयाने फुलांच्या विशेषतः झेंडूच्‍या फुलांच्या बागायतीसाठी सहकार्य करण्याचे ठरवले आहे. कृषी तंत्रज्ञान व्यवस्थापन संस्था व कृषी विभागीय कार्यालय साखळीतर्फे यंदा मोठ्या प्रमाणात झेंडूच्‍या फुलांच्या लागवडीचे काम हाती घेतले आहे. यासाठी कोविड महामारीमुळे या व्यवस्थापनातर्फे ऑनलाईन माहिती शेतकऱ्यांपर्यंत पोचविण्यात आली आहे.

१०० पेक्षा जास्‍त शेतकऱ्यांचा सहभाग

गोव्यात साजऱ्या होणाऱ्या सण-उत्‍सवांत तसेच इतर धार्मिक कार्यासाठी बाहेरील राज्यातून मोठ्या प्रमाणात झेंडूंची फुले आयात केली जातात. पण, यंदा मोठ्या प्रमाणात झेंडूंची फुले गोव्यातच उपलब्ध करून देण्याचा निर्धार साखळी कृषी कार्यालयाने केला आहे; जेणेकरून ग्राहकांना स्वस्त दरात ही फुले उपलब्ध होऊ शकतील. यासाठी साखळी कृषी विभागीय अधिकारी नीलिमा गावस, सहअधिकारी गोविंद परब, कृषी तंत्रज्ञान व्यवस्थापन संस्थेचे किशोर भावे, सहअभियंता सुरेंद्र बेतकीकर, ब्लॉक तंत्रज्ञान व्यवस्थापक पूनम महाले यांनी यासाठी प्रयत्‍न सुरू केले आहेत. यासंबंधी आयोजित केलेल्या ऑनलाईन शिबिरात साखळी व ग्रामीण भागातील १०० पेक्षा जास्त शेतकऱ्यांनी सहभाग घेतला व यासंबंधी सर्व माहिती अधिकाऱ्यांकडून जाणून घेतली.

साखळी, सुर्ल येथे रोपे उपलब्ध

साखळी कृषी विभागीय कार्यालयाकडून साखळी या ठिकाणी व ग्रामीण भागासाठी सुर्ल या ठिकाणी झेंडूंची रोपे उपलब्ध केले आहेत. साखळी येथे कृषी विभागीय कार्यालय व ग्रामीण भागासाठी सुर्ल येथील ऐरावत नर्सरी या ठिकाणी इच्छुकांनी संपर्क करावा, असे आवाहन कृषी अधिकारी नीलिमा गावस व उपअधिकारी सुरेंद्र बेतकीकर यांनी केले आहे.