Goa: मडगावातील एका शहाळेविक्रेत्याने एका नगरसेवकावर हफ्ता घेत असल्याचा आरोप केला आहे. हा नगरसेवक गेल्या आठ-नऊ महिन्यांपासून दर महिन्याला साडेतीन हजार रुपयांचा हफ्ता घेतो असे त्‍याने म्‍हटले आहे. मात्र 'त्‍या' नगरसेवकाने आरोप फेटाळून लावला आहे.

दरम्यान, संबंधित नगरसेवक म्‍हणाला, आपल्या प्रभागात जे लोक रस्‍त्‍यावर बसून विक्री करतात किंवा ज्यांच्यामुळे वाहतुकीला, पादचाऱ्यांना अडथळा निर्माण होतो, अशा विक्रेत्यांवर कारवाई (Action) केली आहे. त्यांचे साहित्‍यही जप्त केले आहे.

त्यामुळेच ते आपल्यावर विनाकारण आरोप करीत आहेत. जर हा विक्रेता हफ्ता देत असेल तर मग त्याचे साहित्‍य नगरपालिकेने (Municipality) का जप्त केले, असा प्रतिसवाल त्‍याने केला.

तसेच, एका विक्रेत्याने नगरसेवकावर हफ्ता घेण्याचा आरोप करणे ही गंभीर बाब आहे. त्याची चौकशी करणे गरजेचे आहे, अशी मागणी मिलाग्रीस फर्नांडिस नामक एका स्थानिकाने व ग्रामस्‍थांनी केली आहे. काल मंगळवारी नगरपालिकेच्या कर्मचाऱ्यांनी त्या विक्रेत्याची शहाळी जप्त केली होती.