Sanjivani Sugar Factory Protest: सकाळपासून राजधानी पणजीत सुरु असलेल्या ऊस उत्पादकांचे आंदोलन अजूनही सुरूच असून, 'जो पर्यंत मुख्यमंत्री आम्हाला भेटून योग्य तो निर्णय देत नाहीत तोपर्यंत आम्ही मागे हटणार नसल्याचे' त्यांनी पत्रकारांना निक्षून सांगितले आहे.

मात्र मुख्यमंत्र्यांनी उद्या म्हणजेच मंगळवारी ऊस उत्पादकांपैकी 5 जणांनी चर्चेसाठी यावे असे सांगितल्याचे प्राथमिक वृत्त हाती आले आहे.

परंतु असं असलं तरी 'कितीही वेळ लागला तरी चालेल पण जो पर्यंत मुख्यमंत्री स्वतः आमच्याशी येऊन याविषयावर बोलत नाहीत तो पर्यंत आम्ही जागेवरून हटणार नसल्याचा पवित्रा आंदोलकांनी घेतलाय.

सरकार 'संजीवनी' का चालू करत नाही याचे उत्तर मुख्यमंत्र्यांनी द्यावे. शेतकरी हा बेकार नाही, तरीही आपल्या हक्कासाठी शेतकरी बांधव एकवटले असून आंदोलनासाठी इतके दिवस ते झगडत आहेत.

सध्या आंदोलनात 350 शेतकरी सहभागी झाले असून बाकीचे शेतीच्या कामात व्यस्त आहेत. राजधानी पणजीत येऊन देखील सरकार दखल घेत नसेल तर आम्ही शेतीत उतरावे की नाही हा प्रश्न आहे अशी उद्विग्न प्रतिक्रिया ऊस उत्पादकांनी दिलीय.

संजीवनी कारखान्याच्या भवितव्याबाबत तसेच या ठिकाणी उद्योग की इथेनॉल प्रकल्प उभा राहील, याचे मुख्यमंत्र्यांकडून जोपर्यंत स्पष्टीकरण मिळत नाही, तोपर्यंत हा लढा सुरूच ठेवण्याचा इशारा ऊस उत्पादक संघटनेने देत आंदोलक अद्यापही घटनास्थळी तळ ठोकून आहेत.