Calangute Night Club: किनारी भागातील वाढते गैरप्रकार रोखण्यासाठी प्रशासन अलर्ट मोडवर असून काही दिवसांपूर्वी कलेक्टर, प्रदूषण नियंत्रण मंडळ आणि पोलिसांनी कळंगुट- बार्देश येथे बेकायदेशीरपणे चालणारे 11 नाईट क्लब बंद केले होते.

याच अनुषंगाने एक महत्वाची बातमी हाती येतेय. उच्च न्यायालयाच्या आदेशानुसार व्यावसायिक आणि विक्रीकर विभागाने कळंगुट- बाग या किनारी भागातील नाईट क्लबवर छापा टाकलाय.

कळंगुटमधील डान्सबार सील केल्यानंतर ही कारवाई करण्यात आली आहे. यावेळी डान्सबारमधील आस्थापनांचे जीएसटी रेकॉर्ड देखील तपासण्यात आलंय.

आज शनिवारी (13 जानेवारी) रात्रौ 9 वाजण्याच्या सुमारास ही कारवाई करण्यात आलीय. या कारवाईवेळी प्रशासनातील कोणते अधिकारी उपस्थित होते यांची माहिती मात्र अद्याप मिळू शकली नाहीय.

गेल्या काही दिवसांपासून राज्यात चालणाऱ्या बेकायदेशीर नाईटक्लबचा मुद्दा गाजत होता. कळंगुट -बागा-वागातोर- हणजूण सारख्या किनारी भागात चालणाऱ्या नाइटक्लब, डान्सबार व मसाज पार्लरच्या नावाखाली अंमली पदार्थ, वेश्याव्यवसाय इतर बेकायदेशीर कृत्यांमध्ये वाढ होऊन यापरिसराचे नाव बदनाम होत असल्याची तक्रार स्थानिकांनी केली होती.

घटनेचे गांभीर्य ओळखून सरकारने पोलीस आणि संबंधित खात्याला या प्रकरणी कडक कारवाईचे आदेशही दिले होते. सार्वजनिक सुरक्षा, सुव्यवस्था आणि नियमांची अंमलबजावणी करण्यासाठी सरकारकडून कडक पाऊले उचलली गेली असल्याचे समजतेय.