Mapusa Police: सोनसाखळी चोरीप्रकरणी लूक आऊट नोटीस जारी केलेल्या संशयितांच्या मुसक्या अखेर कोलवाळ पोलिसांनी वास्कोत आवळल्या.

शुक्रवारी दोघांना ताब्यात घेत अटक करण्यात आली असून अश्पाक कादूर (25) व हुसैन रशीद (23) अशी या संशयितांची नावे आहेत. हे दोघेही चोरटे वास्कोचे रहिवासी आहेत. म्हापसा न्यायालयाने दोघांना तीन दिवसांची पोलिस कोठडी सुनावली.

कोलवाळ पोलिसांच्या माहितीनुसार, गणेशनगर, अस्नोडा येथे एका महिलेची सोनसाखळी हिस्कावून नेल्याप्रकरणी कोलवाळ पोलिसांनी दोघा अज्ञात दुचाकीस्वार संशयित चोरांविरुद्ध लूकआऊट नोटीस जारी केली होती.

ही घटना गेल्या 2 नोव्हेंबर रोजी सकाळी 11.45च्या सुमारास घडली होती. फिर्यादी इवारिस्ता डिसोझा ही महिला अस्नोडा चर्चमधून घरी गणेशनगर येथे जात होती. ती वाड्यावर पोहचताच स्कूटरवरून आलेल्या दोघा चोरांनी तिच्या गळ्यातील सोनसाखळी हिस्कावत तेथून धूम ठोकली होती.

असा लागला छडा...

सीसीटीव्हीत या संशयितांची छबी बंदिस्त झाली होती. त्यानुसार पोलिसांनी संशयितांविरुद्ध छायाचित्रांसह लूकआऊट नोटीस जारी केली. या छायाचित्रांद्वारे वास्को पोलिस स्थानकाच्या एका पोलिस कॉन्स्टेबलने ओळख पटविली व याची माहिती कोलवाळ पोलिसांना दिली. त्यानंतर, कोलवाळ पोलिसांनी वास्को पोलिसांच्या सहाय्याने या चोरांना न्यू-वाडा येथे अटक केली.