Military Engineering Services Goa मांगोरहील-वरुणापुरी येथे मिलिटरी इंजिनिअरिंग सर्व्हिसमधील नौदलाच्या धोकादायक घोषित केलेल्या इमारतीचे काम सुरू ठेवल्याने अचानक स्लॅब कोसळून एका कामगाराचा जागीच मृत्यू झाला, तर दोन कामगार गंभीररित्या जखमी झाले.

स्लॅब कोसळल्याने मडकई येथील खेमकांत नारायण नाईक (वय 50वर्षे) यांचा जागीच मृत्यू झाल्याचे नौदलाच्या जीवंती इस्पितळातील डॉक्टरांनी सांगितले.

या दुर्घटनेत साई महाले (काणकोण) यांच्या दोन्ही पायांना गंभीर दुखापत झाली, तर महाराष्ट्रातील बाबासाहेब सांगले यांच्या डोक्याला जबर दुखापत झाली आहे.

दोघा जखमींवर गोमेकॉत उपचार सुरू आहेत. मृत खेमकांत नाईक यांचा मृतदेह मडगावच्या हॉस्पिसियो इस्पितळात उत्तरीय तपासणीसाठी पाठविला आहे.

परवानाही नाही

या इमारतीला मुरगाव पालिकेचा कोणत्याही प्रकारचा परवाना नसताना नौदलाकडून या इमारतीत कामकाज सुरू होते. या इमारतींचे कचरा शुल्कही नौदल पालिकेकडे भरत नसल्याची माहिती मुख्याधिकारी जयंत तारी यांनी दिली.

अशा किती इमारती असुरक्षित आहेत, याची माहिती नौदलाकडून मागितली असल्याचे तारी यांनी सांगितले.