Gambling In Mandrem गोव्यात सध्या जुगार, बेकायदेशीर बार यांचे प्रमाण वाढत असून मांद्रे गावात देखील चालणारे जुगाराचे धंदे, भंगारअड्डे व सरकारी वेळेचे बंधन न पाळता रात्री उशीरापर्यन्त सुरु असलेले बार यांमुळे स्थानिकांना मनस्ताप सहन करावा लागतोय. या प्रकारांवर कायदेशीर कारवाई करण्यासंबंधी मांद्रे गावंचे सरपंच ॲड. अमित सावंत यांनी पेडणे पोलिस निरीक्षकांना पत्र दिलंय.

बऱ्याच कालावधीपासून हे भंगारअड्डेवाले कोणताच परवाना न घेता बिनधास्तपणे व्यवसाय करीत आहेत. त्याचप्रमाणे परिसरात चालणारे जुगाराचे धंदे, आणि रात्री उशीरा सुरू असलेल्या मद्यालयांवर कायदेशीर कारवाई करून सदर प्रकार बंद करावेत अशा आशयाचे हे पत्र आहे. सदर चाललेले हे बेकायदेशीर प्रकार बंद करून समाजाच्या सुरक्षिततेच्या हिताचे रक्षण करावे असे त्या पत्रात म्हटले आहे.

दरम्यान कोणत्याही परिस्थितीत गुन्हेगारी आणि जुगार- मटका खपवून घेतला जाणार नाही असे मुख्यमंत्री डॉ. प्रमोद सावंत यांनी जाहीर केल्यानंतर पोलिसांनी मटका व जुगारी अड्ड्यावर कारवाई करण्याचे सत्र चालू केले आहे.

नुकतेच राज्यात पोलिसांनी विविध ठिकाणी जुगार अड्ड्यांवर टाकलेल्या छाप्यांमध्ये एकूण 28 जणांना अटक केली असून लाखो रुपयांसह जुगाराचे साहित्य जप्त केल्याची घटना समोर आलीय