पुणे: पुण्यात गोवा बनावटीचे बनावट मद्य जप्त करण्यात आले आहे. आयशरमधून मद्याची वाहतूक केली जात असताना गुरुवारी (१५ मे) पिंपरी येथे ही कारवाई करण्यात आली. अधिकाऱ्यांनी ५२.२८ लाखांचे मुद्देमाल जप्त केला असून, जवळगावच्या ३१ वर्षीय तरुणाला अटक केली आहे.

विशाल सुखलाल वरदे (वय ३१, रा. जळगाव) असे अटक करण्यात आलेल्या तरुणाचे नाव आहे. कारवाईत अधिकाऱ्यांनी २४ लाख ८८ लाख ८०० रुपये किंमतीचे मद्य आणि २७ लाख ४० हजार किंमतीचे वाहन असा एकूण ५२ लाख २८ हजार ८०० रुपयांचा मुद्देमाल जप्त केला आहे.

मिळालेल्या माहितीनुसार, आयशरमधून अवैध मद्याची वाहतूक होत असल्याची माहिती अबकारी खात्याच्या अधिकाऱ्यांना मिळाली. पुणे - मुंबई जुन्या महामार्गावरुन हा आयशर जात असल्याची गुप्त माहिती अधिकाऱ्यांना मिळाली होती. संशयित आशयरची (एमएच १५ जेसी १३८८) वल्लभनगर बस स्थानक, पिंपरी येथे तपासणी करण्यात आली. आयशरमध्ये अवैध मद्यसाठा आढळून आल्यानंतर अधिकाऱ्यांनी कारवाई केली.

आयशरमध्ये रॉयल ब्ल्यु व्हिस्कीचे ३०५ बॉक्स आढळून आले. या मद्याची किंमत २४ लाख ८८ लाख ८०० रुपये असल्याची माहिती समोर आली आहे. दरम्यान, अशा प्रकारची कारवाई यापुढे देखील सुरुच राहिल असे खात्याने म्हटले आहे. नागरिकांना असा काही संशयास्पद बाब आढळून आल्यास पुणे अबकारी खात्याच्या 020-2612-7321 किंवा टोल फ्री क्रमांक 18002339999 किंवा व्हॉट्सअॅप क्रमांक 8422001133 यावर संपर्क साधण्याचे आवाहन करण्यात आले आहे.