Goa Congress Candidate: लोकसभा निवडणुकीसाठी भाजपकडून दक्षिण गोव्याचा उमेदवार रविवारी सायंकाळी जाहीर झाला.

महिला उमेदवार म्हणून पल्लवी धेंपे यांना भाजपने उमेदवारी दिली आहे, त्यामुळे काँग्रेस आता दक्षिण गोव्यात पुरुष उमेदवारावर विश्‍वास ठेवणार की महिला उमेदवार म्हणून कोणी नव्या चेहऱ्याला संधी देऊन धक्कातंत्राचा वापर करणार याकडे लक्ष लागून आहे.

काँग्रेस उमेदवारांच्या ज्या याद्या जाहीर झाल्या, त्यात दोन्ही उमेदवारींवर शिक्कामोर्तब झाले नाही. दोन तीन दिवसांत उमेदवार जाहीर होण्याची शक्यता आहे.

भाजपचा दक्षिणेतील उमेदवार जाहीर झाल्यानंतरच काँग्रेस आपले दोन्ही उमेदवार जाहीर करेल असे स्पष्ट होते.

आता भाजपने उमेदवार जाहीर केल्याने काँग्रेसकडून महिलेविरुद्ध महिलेलाच काँग्रेस उमदेवारी देणार की पुरुष उमेदवारावर विश्‍वास दाखविणार, हे पाहणे उत्सुकतेचे असणार आहे.

भाजपच्या पल्लवी धेंपे या उमेदवार असल्याने भाजपचे केडर आणि नेते, कार्यकर्ते सोमवारपासून कामाला लागणार आहे.

दक्षिण गोव्याचा उमेदवार किमान ६० हजार मतांच्या फरकाने निवडून येईल, असा विश्‍वास मुख्यमंत्री प्रमोद सावंत यांनी केला आहे. काँग्रेसला दक्षिण गोव्यातील उमेदवार हा अल्पसंख्यांकांच्या बळावर पुन्हा निवडून येईल, असा आत्मविश्‍वास आहे.

दक्षिण गोव्यात काँग्रेस आत्तापर्यंत मजूबत मानली जात आहे. विद्यमान खासदार फ्रान्सिस सार्दिन, कॅप्टन विरियातो फर्नांडिस आणि माजी प्रदेशाध्यक्ष गिरीश चोडणकर यांची नावे शर्यतीत आहेत.

काँग्रेसने पुरुष उमेदवार दिल्यास ही लढत महिला विरुद्ध पुरुष अशी प्रतिष्ठेची बनेल. परंतु काँग्रेसने महिला उमेदवार म्हणून एखाद्या नव्या चेहऱ्याला संधी दिलीच, तर दोन्ही पक्षासाठी दक्षिणेतील लढत प्रतिष्ठेची राहील.

आजपर्यंत पक्षासाठी काम करणाऱ्या महिलांवर हा अन्याय आहे. महिला मोर्चामधील महिलांनी केवळ पक्षाचे काम करायचे.

ढोल-ताशे वाजवायचे आणि आयात उमेदवाराला उमेदवारी द्यायची असा हा प्रकार आहे.

- ॲड. अमित पालेकर, निमंत्रक, आम आदमी पक्ष

भाजपमध्ये येताच त्यांना उमेदवारी दिली गेली आहे. ज्यांनी पक्षासाठी कार्य केले आहे आणि पक्ष बांधला आहे, त्या कार्यकर्त्यांकडे भाजपने दुर्लक्ष केले आहे. भाजपच्या कार्यकर्त्यांतून उमेदवार मिळू नये, ही दुर्दैवी बाब आहे.

- अमित पाटकर, प्रदेशाध्यक्ष काँग्रेस