Goa Leopard Attack on Dog: गोव्यातील मायणे निरंकाल या गावात बिबट्याचा वावर असल्याने ग्रामस्थ भयभीत झाले आहेत. नुकतेच येथील एका ग्रामस्थाच्या पाळीव कुत्र्यावर बिबट्याने हल्ला केला होता. यावेळी बिबट्याची कुत्र्याशी झटापट झाली होती.

या झटापटीने संबंधित कुत्र्याचा मालक प्रल्हाद सत्तरकर यांना जाग आली. त्यांनी लाईट लावल्यानंतर बिबट्या कुत्र्याला सोडून पसार झाला.

या घटनेनंतर गावात दहशत परसली असून आता पाळीव कुत्र्यांना देखील घराबाहेर न ठेवता ग्रामस्थ घरात घेऊन झोपत आहेत. बिबट्याच्या भीतीने गावात रात्री फिरणे मुश्किल झाले आहे.

कुत्र्यावरील हल्ल्याच्या या घटनेनंतर हा प्रकार वनविभागाच्या कानावर घालण्यात आला होता. त्यानंतर वन विभागाचे कर्मचारी दोन ते तीन दिवस येऊन गेले. खरे तर काही दिवसांपुर्वीच आणखी कुत्र्यावर बिबट्याने झडप घातली आहे.

आठवड्याच्या काळात दोन घटना घडल्याने ग्रामस्थांमध्ये भीती आहे. त्यांना रात्री-अपरात्री जीव मुठित घेऊन प्रवास करावा लागत आहे. ग्रामस्थांकडून या वनविभागाकडे या बिबट्याचा बंदोबस्त करावा, अशी मागणी केली जात आहे.