मडगाव: गोव्यात (Goa) जो किनारपट्टी व्यवस्थापन आराखडा मसुदा (Coastal Management Plan) तयार केला आहे तो प्रादेशिक आराखडा सामावून करावा असे कायदा म्हणत असताना हा मसुदा तयार करताना प्रादेशिक आराखडा त्यात दाखविलाच नसल्याने हा आराखडा मसुदाच बेकायदेशीर असल्याचा आरोप आज मडगावात (Madgaon) झालेल्या किनारपट्टी आराखडा जन सुनावणीच्यावेळी पर्यावरणवाद्यांनी केला.

ही जनसुनावणी म्हणजे निव्वळ फार्स असून हा मसुदा तयार करताना मासेमारी वस्त्या, मासे पैदास जागा, भरतीच्या जागा दाखविण्यात आलेल्या नाहीत. हा मसुदा तयार करताना सरकारी खात्याकडून माहिती गोळा करायची असते, मात्र अशी कोणतीही माहिती गोळा न करता केवळ एरियल फोटो वरून हा मसुदा तयार केला असल्याने हा मसुदा वस्तुस्थितीला धरून नाही त्यामुळे ही सुनावणी रद्द करून सर्व माहिती गोळा केल्यावरच मसुदा तयार करावा आणि सुनावणी घ्यावी अशी मागणी केली.