पणजी: राज्यात अनेक जमीन घोटाळ्याची प्रकरणे (Goa Land Scam) गाजत असतानाच कामुर्ली-बार्देश येथील जमीन बळकवल्याचा प्रकार उघडकीस अला आहे. ही जमीन सुमारे चार लाख चौरसमीटर असून, सदर जमीन बनावट कागदपत्रांच्या आधारे बळकवण्यात आली आहे. संबंधित प्रकरणामध्ये मुंबई येथील ब्रुनो नोरोन्हा या संशयिताविरुद्ध क्राईम ब्रँचमध्ये (Crime Branch) गुन्हा नोंद करण्यात आला आहे.

ही घटना 2013-14 या साली घडली असून घटने संबंधित मामलेदार, सरकारी अधिकारी चौकशीच्या घेर्‍यात सापडण्याची शक्यता वर्तवली जात आहे. ऑनलाईन 1/14 चा उतरा तपासला असता यामध्ये मूळ मालकाचे रेकॉर्ड वरील नाव नसल्याचे आढळून आले होते.

एरोल सिल्वा पिंटो या दांपत्याच्या नावे असलेली ही जमीन बोगस कागदपत्रांच्या आधारे आपल्या जमिनीचा (Land Scam) मालकी हक्क बदल्याचा आरोप एरोल सिल्वा पिंटो यांनी केला आहे. एरोल सिल्वा पिंटो हे चेंबूर येथे स्थायिक असून, त्यांनी या प्रकरणाची तक्रार क्राईम ब्रँचकडे केली आहे. संबंधित प्रकरणाची दाखल घेत क्राईम ब्रँचने थेट कारवाई केली आहे. या प्रकरणात ब्रुनो नोरोन्हा आणि संबंधितांविरोधात गुन्हा नोंद करण्यात आला आहे.