Entertainment News: कोकणी सिनेमांमध्ये सुरुवातीपासूनच वैविध्यपूर्ण प्रयोग होत आहेत. आणि हे प्रयोगच भविष्यामध्ये कोकणी सिनेमाचे वेगळेपण ठरेल आणि त्यातूनच भारतीय सिनेसृष्टीमध्ये कोकणी सिनेमा आपले स्वतःचे असे स्थान निर्माण करेल.

दरम्यान, यामध्ये गोव्यात सध्या सिनेक्षेत्रात कार्यरत असलेल्या युवा पिढीचा मोठा वाटा असेल, असा विश्वास राज्याचे कला आणि संस्कृती तथा क्रीडामंत्री गोविंद गावडे यांनी व्यक्त केला. सहित स्टुडिओ निर्मित ‘अर्दो दीस’ या कोकणी लघुपटाच्या पोस्टरचे अनावरण पणजीत अनौपचारिक कार्यक्रमामध्ये केल्यानंतर ते बोलत होते.

तसेच, यावेळी ‘अर्दो दीस’चे निर्माते आणि लेखक किशोर अर्जुन, दिग्दर्शक हिमांशू सिंग, छायाचित्रकार अश्विन चिढे, कला संयोजक पंकज कटवारे, यांच्यासोबत रोहित खांडेकर, क्षितिजा गावकर यांची उपस्थिती होती. या लघुपटामध्ये गोमंतकीय कलाकार उगम जांबवलीकर आणि रावी किशोर यांची प्रमुख भूमिका आहे.

हिमांशू सिंग, लघुपट दिग्दर्शक-

ही कलाकृती सगळ्या कलाकारांना अर्पित आहे. कारण यामध्ये आम्ही कलाकारांच्या जगण्याचा वेध घेतलेला आहे. कलाकार म्हणून स्वतःला प्रस्थापित करण्यापूर्वी या कलाकाराला किती प्रकारच्या जगण्यातून जावे लागते, हे ‘अर्दो दीस’मध्ये प्रामुख्याने आपल्याला दिसणार आहे. ‘अर्दो दीस’ आता पूर्ण झाला असून, विविध आंतरराष्ट्रीय सिनेमहोत्सवांमध्ये प्रदर्शित होण्यासाठी सज्ज झाला आहे.