Kala Academy Goa: मागील 3 वर्षांपासून दुरुस्तीसाठी बंद ठेवण्यात आलेली पणजीत कला अकादमी अद्यापही सुस्थितीत नसल्याचे एका घटनेनंतर समोर आले आहे.

कला अकादमी संकुल दुरुस्ती करून अजून सार्वजनिक बांधकाम खात्याने कला आणि संस्कृती खात्याकडे सुपूर्द केलेले नाहीय.

सार्वजनिक बांधकाम खात्याचे मुख्य अभियंता उत्तम पार्सेकर यांनी दिलेल्या माहितीनुसार कला अकादमी पुढील पंधरवड्यात कला आणि संस्कृती खात्याकडे सुपूर्द करण्यात येणार आहे.

मात्र कला अकादमीमधून मिळालेल्या माहितीनुसार येथील बरेचसे काम अपूर्ण असून तळमजला वगळता पहिल्या मजल्या वरील काम शिल्लक आहे.

सध्या कला अकादमीत कार्यक्रम सादर करण्यास सुरुवात झाली असून कला प्रेमींसाठी ही आनंदाची गोष्ट आहे.

मात्र याठिकाणी अजून साधन सुविधांची वानवा जाणवत आहे. तब्बल तीन वर्षा नंतर पहिल्यांदाच कला अकादमीच्या मास्टर दीनानाथ मंगेशकर सभागृहात तियात्र सादर करण्यात आले.

मात्र सादरीकरणावेळी ध्वनी व्यवस्था खराब असल्याने त्यांना बाहेरून ध्वनी व्यवस्था मागवावी लागल्याने तियात्र सॅड्रीकरां करणाऱ्या संस्थेने नाराजी व्यक्त केलीय.

तसेच सभागृहाबाहेर कँटीन सुरु झाले नसल्याने प्रेक्षकांचा हिरमोड होत आहे. जो पर्यंत कॅन्टीनचे कंत्राट दिले जात नाही तोपर्यंत आयोजकांनाच लोकांच्या खाण्यापिण्याची व्यवस्था करावी लागणार असल्याचे कला अकादमीने म्हटले आहे.

मागील तीन वर्षांपासून कला अकादमी दुरुस्तीसाठी बंद ठेवण्यात आली होती. त्यामुळे सहाजिकच कलाकारांचे बरेच नुकसान झाले.

मात्र म्ही महिन्यांपासून येथे सांस्कृतिक कार्यक्रमांचे सादरीकरण होऊ लागल्याने कलाकारांमध्ये उत्साहाचे वातावरण तयार झाले होते. मात्र कला अकादमी सोयीसुविधांनी परिपूर्ण कधी होणार याकडे सर्वांचे लक्ष लागून राहिले आहे.