पणजी: बार्देश तालुक्यातील मोयरा येथील जोशुआ डिक्रूझ याने ''ऑल इंडिया जेईई (ॲडव्हान्स्ड) २०२६'' ही अत्यंत प्रतिष्ठेची आणि कठीण मानली जाणारी परीक्षा उत्तीर्ण करून गोव्याचे नाव उज्ज्वल केले आहे. दिव्यांग प्रवर्गात त्याने देशभरातून ६९ वा क्रमांक मिळवत उल्लेखनीय यश संपादन केले आहे.

विशेष म्हणजे, जेईई (ॲडव्हान्स्ड) परीक्षा उत्तीर्ण होणारा जोशुआ हा गोव्यातील पहिलाच दिव्यांग विद्यार्थी ठरला आहे. त्यामुळे त्याच्या या यशाचे राज्यभरातून कौतुक होत असून विविध स्तरांतून अभिनंदनाचा वर्षाव होत आहे. गोवा दिव्यांग हक्क संघटनेनेही त्याचे अभिनंदन करून पुढील शैक्षणिक आणि व्यावसायिक वाटचालीसाठी शुभेच्छा दिल्या आहेत.

आयआयटीमध्ये प्रवेश घेण्याचे ध्येय असलेल्या जोशुआने आपल्या जिद्द, मेहनत आणि चिकाटीच्या जोरावर हे यश मिळवले आहे. त्याने इयत्ता बारावीचे शिक्षण म्हापसा येथील सेंट झेवियर्स उच्च माध्यमिक विद्यालयातून पूर्ण केले असून दहावीपर्यंतचे शिक्षण होली क्रॉस कॉन्व्हेंट हायस्कूलमध्ये घेतले आहे.

जोशुआचे हे यश दिव्यांग विद्यार्थ्यांसाठी प्रेरणादायी ठरत असून, कठोर परिश्रम आणि आत्मविश्वासाच्या बळावर कोणतेही ध्येय गाठता येते, याचे ते ज्वलंत उदाहरण मानले जात आहे.

गुणी संगीतकार!

शैक्षणिक क्षेत्रात चमकदार कामगिरी करणारा जोशुआ संगीत क्षेत्रातही तितकाच प्रगल्भ आहे. तो एक अष्टपैलू आणि गुणी संगीतकार असून तब्बल सहा वेगवेगळी वाद्ये वाजवण्याचे कौशल्य त्याच्याकडे आहे. अभ्यास आणि संगीत या दोन्ही क्षेत्रांमध्ये संतुलन साधत त्याने स्वतःची स्वतंत्र ओळख निर्माण केली आहे.