Dabolim Airport Global Recognition : गोवा आंतरराष्ट्रीय विमानतळ (दाबोळी) याने एअरपोर्ट्स कौन्सिल इंटरनॅशनलच्या प्रतिष्ठित पुरस्कारांमध्ये भारतीय विमानतळ प्राधिकरणाच्या सर्व विमानतळांमध्ये द्वितीय क्रमांक मिळवला असून जागतिक क्रमवारीत ५९वे स्थान पटकावले आहे.

हे मानांकन पूर्णपणे प्रवाशांच्या प्रत्यक्ष अभिप्रायावर आधारित असून, विमानतळावरील सेवा, स्वच्छता, कर्मचाऱ्यांचे सौजन्य आणि एकूण प्रवास अनुभव यांचा विचार करण्यात येतो. विमान वाहतूक क्षेत्रात हा पुरस्कार अत्यंत मानाचा समजला जातो.

विमानतळ संचालक फ्लाइट लेफ्टनंट आकाश दीप यांनी या यशाबद्दल आनंद व्यक्त करताना, संपूर्ण टीम, एअरलाईन भागीदार आणि संबंधित घटकांच्या एकत्रित प्रयत्नांमुळे हे यश मिळाल्याचे सांगितले.

भविष्यात सेवा अधिक उंचावून जागतिक क्रमवारीत अव्वल स्थान मिळवण्याचे लक्ष्य असल्याचेही त्यांनी नमूद केले. या यशामुळे गोव्याच्या पर्यटन क्षेत्राला चालना मिळून आंतरराष्ट्रीय पर्यटकांचा ओघ वाढण्याची शक्यता व्यक्त होत आहे.