Goa Weather: राज्यातील तापमानात सातत्याने वाढ चालले असून लोक हैराण झाले आहेत. आज तब्बल ९१ टक्के एवढ्या सर्वाधिक आर्द्रतेची नोंद करण्यात आली, जी सर्वसामान्य आर्द्रतेच्या तुलनेत १५ टक्के अधिक आहे. उष्मा तसेच आर्द्रतेत मोठ्या प्रमाणात वाढ होणार असल्याची शक्यता गोवा वेधशाळेने वर्तविली आहे.

दरम्यान, राज्यात सर्वाधिक ३४.६ अंश सेल्सिअस तर किमान २६.२ अंश सेल्सिअस तापमानाची नोंद करण्यात आली. पुढील तीन दिवस राज्यात किमान २५ तर कमाल ३५ अंश सेल्सिअसदरम्यान तापमान राहणार आहे. तसेच काही भागात पहाटे धुके पडण्याची शक्यता आहे. यंदा मार्च महिन्यातच दोन वेळा तापमानाचा पारा ३५ अंशांवर गेला होता. राज्यात आज जी ३४.६ अंश सेल्सिअस तापमानाची नोंद करण्यात आली, ती आतापर्यंतची एप्रिलमधील सर्वाधिक नोंद आहे.

दुसरीकडे, भारतीय हवामान विभागाने (IMD) आज उत्तर गोवा, महाराष्ट्र, आंध्र प्रदेश, तेलंगणा आणि पश्चिम बंगालसह देशातील विविध राज्यांसाठी उष्णतेच्या लाटेची चेतावणी जारी केली आहे. यूपी-बिहारसह अनेक राज्यांमध्ये उष्णतेची लाट येण्याची चिन्हे आतापासूनच दिसू लागली आहेत.

याव्यतिरिक्त, IMD ने विशेषत: महाराष्ट्रातील ठाणे, मुंबई आणि रायगड सारख्या शहरांसाठी एक वेगळी चेतावणी जारी केली, जी या आठवड्यात येऊ घातलेल्या उष्णतेची लाट दर्शवते. महाराष्ट्रातील मुंबई आणि ठाणे येथे किमान तापमान 36 ते 38 अंश सेल्सिअस राहण्याचा अंदाज आहे. IMD नुसार, ओडिशा आणि पश्चिम बंगालमध्ये 19 एप्रिलपर्यंत, आंध्र प्रदेशात 18 एप्रिलपर्यंत, तेलंगणात 17 ते 18 एप्रिलपर्यंत आणि उत्तर गोव्यात 16 एप्रिलपर्यंत उष्णतेची लाट कायम राहण्याची शक्यता आहे.

दुसरीकडे, दक्षिण भारताबद्दल बोलायचे झाल्यास कोल्लम, त्रिशूर, पलक्कड आणि तिरुअनंतपुरमसह केरळमधील अनेक जिल्ह्यांमध्ये यलो अलर्ट जारी करण्यात आला आहे. याशिवाय, अलप्पुझा, पथानामथिट्टा, कोट्टायम, एर्नाकुलम आणि कासारगोड या जिल्ह्यांमध्ये या आठवड्यात उच्च तापमानाची शक्यता आहे. तथापि, वायव्य भारतातील हवामान अंदाजकर्त्यांनी आज जोरदार वारा, गारपीट आणि गडगडाटासह पावसाचा अंदाज वर्तवला आहे. येत्या चार दिवसांत पुन्हा पाऊस पडण्याची शक्यता आहे.