पणजी: गोवा गृहनिर्माण मंडळाने हरवळे–साखळी आणि माडेल–थिवी येथील १७,६२३ चौरस मीटर क्षेत्रफळाचे दोन मोठे भूखंड ई-लिलावाद्वारे विक्रीसाठी काढले आहेत. परंतु, हे भूखंड खरेदी करण्‍यासाठी मूळ ठेव म्हणून एक ते तीन कोटी रुपये असणे गरजेचे करण्यात आले आहे.

मंडळाने जारी केलेल्‍या नोटिशीनुसार, हरवळे-साखळी येथील ३,८२८ आणि माडेल-थिवी येथील १३,७९५ चौरस मीटरच्‍या भूखंडाची ई-लिलाव पद्धतीने विक्री केली जाणार आहे.

त्‍यासाठी इच्छुकांना www.goaonline.gov.in या अधिकृत संकेतस्थळावर २५ सप्टेंबर २०२६ ते १९ ऑक्टोबर २०२६ या कालावधीत ऑनलाईन अर्ज सादर करता येणार आहेत.

हरवळे-साखळी येथील भूखंडाचा मूळ दर २,५०० रुपये प्रति चौरस मीटर ठेवण्यात आला असून या भूखंडासाठी १०० एफआर मंजूर आहे. या लिलावात उतरण्यासाठी अर्जदाराला सुरुवातीला एक कोटी रुपयांची अनामत रक्कम मंडळाकडे जमा करावी लागणार आहे.

माडेल-थिवी येथील भूखंडाचा मूळ दर १३,५०० रुपये प्रति चौरस मीटर असून यासाठी १५० एफआर मंजूर आहे. या लिलावात सहभागी होण्यासाठी तीन कोटी रुपयांची अनामत ठेव जमा करावी लागेल.