ST Reservation मागील काही काळापासून गोव्यात ST समाजाला राजकीय आरक्षण मिळावे हा मुद्दा बराच गाजतोय. एसटी समाजाला राजकीय आरक्षण मिळावे, यासाठी यापूर्वी मिशन पॉलिटिकल रिझर्व्हेशनच्या शिष्टमंडळाने राष्ट्रपती द्रौपदी मुर्मू यांना आपले निवेदन सादर केले गेले होते.

गोव्यात एसटी बांधवांना अजून त्यांचा हा घटनादत्त अधिकार देण्यात आलेला नाही, याकडेही त्यांनी त्यावेळी लक्ष वेधले होते.

याबाबत एक अपडेट हाती येतेय, एसटीच्या शिष्टमंडळाचे असे म्हणणे आहे की, केंद्रीय मंत्री आणि भारतीय निवडणूक आयोगाला एसटी आरक्षणाबाबत त्यांनी माहिती दिली होती. मात्र गोवा सरकारने एसटी आरक्षणाबाबत कोणताही प्रस्ताव पाठवला नसल्याचे केंद्राचे म्हणणे आहे.

गोवा सरकारकडे ST समाजाला आरक्षण देण्याची राजकीय इच्छाशक्ती नाही असा आरोप शिष्टमंडळाने पत्रकार परिषदेत केलाय.

ST समाजाला खरोखरच आरक्षण मिळावे असे सरकारला वाटत असेल तर त्यांनी गोवा सरकारने केंद्राकडे योग्य तो प्रस्ताव पाठवावा अशी मागणी त्यांनी यावेळी केलीय.

मिशन पॉलिटिकल रिझर्व्हेशनच्या शिष्टमंडळाने यापूर्वी केंद्रीय आदिवासी कल्याण मंत्री अर्जुन मुंडा, केंद्रीय मंत्री श्रीपाद नाईक यांची भेट घेऊन त्यांना निवेदन दिले होते. तसेच अनुसूचित जातीजमाती कल्याणासाठी नेमलेल्या संसदीय समितीचे अध्यक्ष डॉ. किरीट सोमजीभाई सोळंकी यांची देखील भेट घेऊन त्यांनाही हे निवेदन दिले होते.