गोव्यात आज दिवसभरात 172 नव्या कोरोना बाधित रूग्णांची नोंद झाली असून, 158 कोरोनामुक्तांना डिस्चार्ज देण्यात आलाय. गोव्यात सध्याच्या घडीला 932 सक्रिय कोरोना रूग्णांवर उपचार सुरू आहेत. दिलासादायक बाब म्हणजे मागील दोन दिवसांत गोव्यात एकाही कोरोना रूग्णाचा मृत्यू झालेला नाही.

सध्या गोव्याचा कोरोना पॉझिटीव्हीटी रेट 11.9 टक्के एवढा आहे. विशेष म्हणजे गोव्याचा पॉझिटीव्हीटी रेट राष्ट्रीय सरासरीपेक्षा अधिक आहे.

आरोग्य विभागाने प्रसिद्ध केलेल्या आकडेवारीनुसार, गोव्यात आजवर 2 लाख 54 हजार 859 जणांना कोरोनाची बाधा झाली आहे. त्यापैकी 2 लाख 49 हजार 970 जणांना डिस्चार्ज देण्यात आला आहे. राज्याचा रिकव्हरी रेट 98.08 टक्के एवढा आहे. राज्यात कोरोनामुळे 3,957 रूग्ण दगावले आहेत. दरम्यान, आज दिवसभरात 1,446 प्रयोगशाळा नमुने तपासले आहेत.

देशात 13,272 कोरोना रूग्णांची नोंद, 36 मृत्यू

देशात देखील कोरोना रूग्णांची संख्या पुन्हा वाढताना दिसत आहे. गेल्या 24 तासांत देशभरात 13,272 नव्या कोरोना बाधित रूग्णांची नोंद झाली असून, 36 रूग्णांचा मृत्यू झाला आहे. सध्याच्या घडीला देशात 1 लाख 01 हजार 116 रूग्ण उपचाराधीन आहेत. देशात सध्या महाराष्ट्र, केरळ, कर्नाटक, दिल्ली, पंजाब या राज्यात सर्वाधिक सक्रिय कोरोना रूग्ण आहेत.