पणजी: गोव्यातील आकाशप्रेमी आणि खगोलशास्त्र रसिकांसाठी आजची रात्र विशेष ठरणार आहे. ऑक्टोबर महिन्यातील सुपरमून मालिकेतील पहिला “हार्वेस्ट मून” आज मंगळवारी रात्री गोव्याच्या आकाशात झळकणार आहे. या महिन्यातील तीनही सुपरमूनपैकी हा पहिला आणि सर्वात तेजस्वी चंद्र असेल.

हा “हार्वेस्ट मून” वर्षातील सर्वात मोठा आणि प्रकाशमान चंद्र मानला जातो. पूर्वीच्या काळात शेतकरी आपल्या पिकांची कापणी करण्यासाठी या चंद्राच्या उजेडाचा उपयोग करत असत, म्हणूनच त्याला “हार्वेस्ट मून” असे नाव देण्यात आले आहे.

वैज्ञानिकांच्या मते, आज दिसणारा हा सुपरमून सामान्य पौर्णिमेपेक्षा जवळपास १४ टक्के मोठा आणि ३० टक्के अधिक तेजस्वी असेल. चंद्र क्षितिजावर उगवताना तो सोनसळी आणि नारिंगी छटांमध्ये दिसेल, ज्यामुळे आकाशाचा देखावा अधिक मोहक होणार आहे.

गोव्यातील आकाशप्रेमींना संध्याकाळी ६:४५ नंतरपासून रात्री ९ वाजेपर्यंत हा चंद्र सर्वाधिक तेजस्वी स्वरूपात पाहता येईल. स्वच्छ आकाश असल्यास पणजी, मडगाव, कळंगुट आणि मुरगाव या भागांतून त्याचे स्पष्ट दर्शन घेता येणार आहे.

या सुपरमून मालिकेतील पुढील दोन चंद्र अनुक्रमे नोव्हेंबर आणि डिसेंबर महिन्यात दिसणार आहेत.

• नोव्हेंबरचा सुपरमून – त्रिपुरी पौर्णिमा व कार्तिक पौर्णिमा तसेच गुरु नानक जयंती सोबत साजरा होईल.

• डिसेंबरचा सुपरमून – मार्गशीर्ष पौर्णिमा म्हणजेच दत्त जयंतीच्या रात्री आकाशात झळकणार आहे.

गोव्यातील नागरिक आणि पर्यटकांसाठी पणजी येथील सार्वजनिक खगोलशास्त्रीय वेधशाळेत आजच्या सुपरमूनसाठी विशेष कार्यक्रम आयोजित करण्यात आला आहे. संध्याकाळी ७ ते ९ वाजेपर्यंत खुल्या आकाशाखाली दुर्बिणीद्वारे विशेष निरीक्षण केले जाईल.