Harvalem Accident: काळ आला होता पण वेळ आली नव्हती याचा प्रत्यय गुरुवारी रात्रौच्या सुमारास हरवळे येथील मळीक कुटुंबीयांनी घेतला. घडलेली घटना अशी की, मधलावाडा वरचे हरवळे येथील रवी मळीक यांच्या घरावर गुरूवारी दि. 23 नोव्हेंबर रोजी रात्री सुकलेल्या आंब्याच्या झाडाची फांदी पडून त्यांच्या घराचे, स्कुटरचे नुकसान झालेच पण या घटनेत सुदैवाने घरातील दोन महिला बालंबाल बचावल्या आहेत.

या घटनेसंबंधी सविस्तर माहिती अशी कि, रवी मळीक यांच्या मातोश्री राधिका मळीक (वय ७० वर्ष) या गुरुवारी रात्री बाथरूमला जाण्यासाठी म्हणून उठल्या आणि खोली बाहेर गेल्या त्याचवेळी त्याच्या घरालगत असलेल्या आंब्याच्या झाडाची भली मोठी फांदी राधिका आज्जी झोपत असलेल्या खोलीवर पडली.

या घटनेतील धक्कादायक गोष्ट म्हणजे ती झाडाची फांदी आणि फांदीच्या वजनाने मोडलेली छप्पराची कौले असे सगळे सामान थेट त्या आज्जीच्या कॉटवर पडला आणि तोही उशी ठेवण्याच्या ठिकाणीच. केवळ दैव बलवत्तर म्हणून या घटनेत राधिका राजाराम मळीक या वृध्देचे प्राण वाचले.

तर त्याचवेळी त्यांची सून राखी ह्यादेखील पाणी गरम करण्यासाठी म्हणून खोलीबाहेर येत होत्या. मात्र मोठा आवाज झाल्याने त्याही तिथून जलदगतीने घराबाहेर पडल्याने त्याही बालंबाल बचावल्या.

महत्वाचे म्हणजे राधिका आजी गेले 4 महिने अंथरुणाला खिळून होत्या. मात्र मागील आठवडाभरापासून त्यांच्या तब्येतीत सुधारणा होऊन त्या हिंडू-फिरू लागल्या होत्या.

या धक्कादायक घटनेत मळीक कुटुंबियांच्या घराचे नळे- पत्रे फुटून, वासे मोडून नुकसान झालेय. तसेच त्यांनी नवीनच घेतलेल्या दुचाकीचेही मोठे नुकसान झालेय. घटनास्थळी सरपंच, तलाठी यांनी भेट देत पाहणी केलीय. मात्र या घटनेतून मळीक कुटुंबीय अजूनही सावरले नाहीय.