पणजी: शिरगाव येथील श्री लईराई देवीच्या यात्रेवेळी झालेल्या चेंगराचेंगरीच्या घटनेनंतर गोवा सरकार अ‍ॅक्शन मोडमध्ये आले आहे. सरकारने उत्तर गोवा जिल्हाधिकारी स्नेहा गिते, पोलिस अधीक्षक (SP) अक्षत कौशल, पोलीस उपअधीक्षक (Dysp) जिवबा दळवी आणि डिचोलीचे पोलिस निरीक्षक तसेच, डिचोलीचे उपजिल्हाधिकारी यांची बदली केली आहे. चेंगराचेंगरीच्या घटनेचा पारदर्शक आणि योग्य तपास व्हावा यासाठी ही बदली करण्यात आल्याची माहिती राज्याचे मुख्यमंत्री डॉ. प्रमोद सावंत यांनी दिली.

शिरगाव जत्रेतील घटनेची सखोल चौकशी करण्यासाठी दंडाधिकारी फॅक्ट फायन्डिंग समिती स्थापन करण्यात आली आहे. महसूल सचिव संदीप जेकस यांच्या अध्यक्षतेखाली ही समिती स्थापन करण्यात आली आहे.

या समितीचा अहवाल उद्यापर्यंत (रविवारी) सादर करण्यास सांगितले आहे, असे मुख्यमंत्री सावंत म्हणाले. घटनेचा आढावा घेण्यासाठी आयोजित करण्यात आलेल्या उच्च स्तरीय बैठकीनंतर मुख्यमंत्री सावंत यांनी प्रसार माध्यमांशी संवाद साधला.

गेल्या अनेक वर्षापासून शिरगावची यात्रा व्यवस्थित पद्धतीने पार पडत आहे. पण, अशा पद्धतीची घटना केव्हाच घडली नाही. या घटनेत कळत नकळत कोणी सहभाग दिसून आल्यास त्यांच्यावर कारवाई होण्याची गरज आहे. देवस्थान समितीच्या अध्यक्षांनी देखील घटनेबाबत सविस्तर माहिती दिली आहे. या घटनेत मृत्यू झालेल्यांच्या प्रती आमच्या सहवेदना आहेत. चार कृटुंबियांच्या घरी मी भेट दिलीय.

मृत आणि जखमींना आर्थिक मदत

चेंगराचेंगरीत मृत पावलेल्यांना सरकारच्या वतीने दहा लाख रुपयांची मदत जाहीर करण्यात आली असून, जखमींना (रुग्णालयात असणारे) एक लाख रुपये मदत दिली जाईल, अशी माहिती मुख्यमंत्री सावंत यांनी दिली.