Goa Shacks: 11 ठिकाणी शॅक घालण्यासाठी कोणीच अर्ज न केल्याने तेथे पुन्हा परवाने देण्यासाठी पर्यटन खाते अर्ज मागवण्याचा विचार करत आहे. सध्या सोडतीद्वारे परवानाधारक निश्चित केल्यानंतर त्यांनी गोवा इलेक्ट्रॉनिक्स लिमिटेडच्या माध्यमातून परवाना शुल्क अदा करणे सुरू केले आहे. ती प्रक्रीया पूर्ण केल्यानंतरच या नव्याने अर्ज मागवण्याचा विचार केला जाणार आहे.

यंदा 364 शॅक देण्यासाठी अर्ज मागवण्यात आले होते. उत्तर गोव्यात 259 तर दक्षिण गोव्यात 105 शॅक परवाने निश्‍चित केले होते. मात्र अर्जाला प्रतिसाद म्हणून काढलेल्या सोडतीतून त्यापैकी उत्तर गोव्यात 255 तर दक्षिण गोव्यात 98 परवाने देण्यात येणार आहेत. त्यामुळे 11 ठिकाणी परवाने पहिल्या टप्प्यात दिले जाणार नाहीत. त्यासाठी पून्हा एकदा अर्ज मागवले जाऊ शकतात.

शॅकपैकी सर्वाधिक 108 शॅक हे कळंगुट येथे तर त्याखालोखाल बागा येथे 84 शॅक आहेत. एकतर पुन्हा अर्ज मागवणे किंवा परवाने न मिळालेल्या अर्जदारांना पून्हा या 11 ठिकाणच्या परवान्यांसाठी संधी द्यावी असे दोन पर्याय पर्यटन खात्यासमोर आहे. त्यातून योग्य तो पर्याय निवडण्याचा खाते प्रयत्न करत आहे.