Goa Karnataka Conflict : म्हादई पाणी वाटपावरून कर्नाटक आणि गोवा राज्यात न्यायालयीन वाद सुरू असतानाच कर्नाटकने आता हलतरा नाल्यावर पाणी वळविण्यासाठी पोल घालून आखणी (मार्किंग) सुरू केल्याचे निदर्शनास आले आहे. ही बाब सर्वोच्च न्यायालयाबरोबर म्हादई जलतंटा लवादासमोर मांडणार असल्याची माहिती जलस्रोत मंत्री सुभाष शिरोडकर यांनी दिली.

मंत्री शिरोडकर म्हणाले, या प्रश्‍नी सरकार गंभीर आहे. म्हादई खोऱ्यातील पाणीवाटप सर्वोच्च न्यायालयात आणि म्हादई पाणीवाटप तंटा लवादाकडे आहे. याविषयीच्या अधिकच्या संशोधनासाठी लवादाला आणखी एक वर्षाची मुदत दिली आहे. या प्रकरणाची सर्वोच्च न्यायालयातील सुनावणी 10 ऑगस्ट रोजी येण्याची शक्यता आहे. यापूर्वी 2014 मध्ये कर्नाटकने या प्रकरणाचा संपूर्ण निकाल येण्यापूर्वी पाण्याचा वापर करणार नाही आणि पाणी वळवणार नाही, असे स्पष्ट केले होते.

म्हादईवर कर्नाटक सरकारचे अहंकारी वर्चस्व सुरू आहे. गोवा सरकार मात्र त्याकडे वेगळ्याच अर्थाने पाहात आहे. मुख्यमंत्री डॉ. प्रमोद सावंत यांनी याबाबत ठाम राहून कर्नाटकला म्हादई नदीवरील बंधारा बांधण्यापासून रोखावे, अशी मागणी गोवा फॉरवर्ड पक्षाचे सर्वेसर्वा आणि फातोर्ड्याचे आमदार विजय सरदेसाई यांनी केली आहे.