Goa Government: स्वयंसहाय्य गटांकडून आठवीपर्यंतच्या विद्यार्थ्यांना पुरवल्या जाणाऱ्या माध्यान्ह आहाराबाबतचे दर वाढवले जातील. मात्र, दर्जाबाबत तडजोड सहन करणार नाही, अशी तंबी मुख्यमंत्री डॉ. प्रमोद सावंत यांनी काल दिली.

राज्यात मुलांना स्वयंसहाय्य गटांमार्फत माध्यान्ह आहार पुरवला जातो. यासाठीची दिली जाणारी रक्कम वाढवावी अशी मागणी करत आहार पुरवठा बंद करण्याचा इशारा त्यांनी दिला होता. यावर मुख्यमंत्री म्हणाले, स्वयंसहाय्य गटांना पैसे देण्यासाठी अडचण नाही. आपण पैसे वाढवतो.

मात्र, आहाराच्या दर्जाबाबत तडजोड नको. स्वयंसहाय्य गटांमार्फत दिल्या जाणाऱ्या आहारांपैकी 50 टक्के मुले हा आहार खात नाही, अशा तक्रारी आहेत. त्यामुळे आहारात बदल करून पावाऐवजी चपाती देण्यात यावी आणि भाजीचा दर्जा वाढवावा, असे मुख्यमंत्र्यांनी स्पष्ट केले आहे.

प्रतिविद्यार्थी 1.90 पैसे देणार अतिरिक्त

योजनेच्या प्रारंभी प्रतिविद्यार्थी 2 रुपये 50 पैसे दिले जात होते. कोरोनानंतर पाचवीपर्यंत 6 रुपये 11 पैसे व आठवीपर्यंतच्या विद्यार्थ्यांना 7 रुपये 45 पैसे दिले जातात. मात्र, स्वयंसहाय्य गटांनी पाचवीपर्यंत 8 रुपये तर आठवीपर्यंतच्या विद्यार्थ्यांसाठी 10 रुपयांची मागणी होती. यावर सरकारने प्रतिविद्यार्थी 1 रुपये 90 पैशांची वाढ केली आहे.