Goa Government: सांतआंद्रेतील खाजन शेती जमीन पाण्याखाली गेली असून ती पुनरुज्जीवित करण्यात येणार आहे. अनेक ठिकाणी बांधाला पडलेल्या भेगा दुरुस्त करण्यात आल्या. त्यामुळे आजोशी, नेवरा खाजन येथे काही भागात शेती केली जाते. परंतु मोठी कामे सुरू करण्यासाठी जलस्रोत खाते आणि भू संवर्धन खात्याकडे पुरेसा निधी उपलब्ध नाही.

दरम्यान, त्यामुळे केंद्र सरकारकडे निधीसाठी विनंती केली आहे. निधी उपलब्ध झाल्यानंतर काम सुरू केले जाणार आहे, असे आश्‍वासन सरकारने दिले आहे, अशी माहिती आमदार वीरेश बोरकर यांनी दिली. ‘खाजन’ सांतआंद्रेतीलच नव्हे, तर राज्यातील एक प्रमुख विषय आहे. सध्या शेती जमीन नावावर करण्याची मोहीम सुरू केली आहे, कारण शेती जमीन नावावर नसल्याने टेनंट संघटनेच्या मतदानाचा हक्क शेतकऱ्यांना मिळत नाही.

तसेच, यासंदर्भात कायदा दुरुस्ती करण्याची मागणी विधानसभेत करणार आहे. तसेच 3 ए अर्ज देखील पूर्ण केले नसल्याने शेतकऱ्यांच्या कुटुंबीयांच्या नावावर शेती जमीन दाखवत नाही. या सर्व समस्यांचे निवारण करण्यासाठी प्रयत्न सुरू आहेत, असे बोरकर यांनी स्पष्ट केले.

जलस्रोतमंत्री सुभाष शिरोडकर यांना सांतआंद्रेतील पाण्याखाली बुडलेली खाजन शेती जमीन दाखवली आहे. तसेच बांधाला पडलेल्या भेगा देखील त्यांच्या नजरेस आणून दिले आहे. सध्या आजोशी येथील सेंट मॅथ्यू टेनंट संघटनेच्या अखत्यारीत येणाऱ्या बांधाचे 15 लाख रुपयांचे दुरुस्ती काम सुरू केले आहे. छोटी कामे हाती घेऊन किमान थोडी जमीन पुन्हा शेतीसाठी उपलब्ध करून देण्याचे निश्‍चित झाले आहे, असे बोरकर यांनी सांगितले.