Maharashtra Assembly Elections 2024

पणजी: महाराष्ट्र विधानसभेसाठी येत्या २० नोव्हेंबर रोजी मतदान होत आहे. मतदानासाठी आता केवळ एक दिवस शिल्लक आहे. राज्य मतदानासाठी सज्ज होत असताना गोवा सरकारने देखील येथे काम करणाऱ्या महाराष्ट्रातील नागरिकांना भरपगारी सुट्टी जाहीर केलीय. सुट्टीबाबतचा सरकारी आदेश देखील प्रसिद्ध करण्यात आला आहे.

गोवा सरकारच्या वतीने याबाबत आदेश जारी करण्यात आलाय. महाराष्ट्र विधानसभा निवडणुकीसाठी २० नोव्हेंबर रोजी मतदानासाठी पगारी सुट्टी असेल. कंपनीत काम करणारे काम कामगार, सरकारी विभागातील कर्मचारी, खासगी क्षेत्रातील कामगारांना सुट्टी असेल, असे आदेशात म्हटले आहे.

महाराष्ट्रातील २८८ विधानसभा जागांसाठी एकाच टप्प्यात २० नोव्हेंबर २०२४ रोजी मतदान होणार आहे. मतदानासाठीची सर्व तयारी पूर्ण झाली आहे. प्रचाराच्या तोफा आज (१८ नोव्हेंबर) थंडावत आहेत.

महायुती आणि महाविकास आघाडीने राज्यभर जोरदार प्रचार केला असून, राज्यात कोणाची सत्ता येणार याबाबत उत्सुकता ताणली गेलीय. शिवसेना आणि राष्ट्रवादीच्या फुटीनंतर होणारी ही पहिलीच निवडणूक आहे. त्यामुळे २३ रोजी लागणाऱ्या निकालाकडे सर्वांच्या नजरा लागल्या आहेत.