Goa Government: सरकारच्या जीसीझेडएमए प्राधिकरणाकडून पोर्तुगीज काळापासून कळंगुट किनाऱ्यावर कार्यरत असलेल्या सौझा लोबो बार व रेस्टॉरंट पाडण्याचा इशारा देण्याबरोबरच अर्धवट कागदपत्रांच्या आधारे आपली व आपल्या कुटुंबीयांची वारंवार सतावणूक करण्यात येत असल्याचे जुआन सौझा लोबो यांनी बुधवारी प्रसार माध्यमांशी बोलताना सांगितले.

सौझा लोबो रेस्टॉरंट 1932 पासून या भागात कार्यरत असून त्याकाळी गोव्यात पोर्तुगीज सत्ता होती. त्यावेळी सीआरझेड कायदा गोव्यात अस्तित्वात नव्हता. त्यामुळे रेस्टॉरंट बेकायदा नाही, सीआरझेड कायदा गोवा मुक्तीनंतर राज्यात लागू करण्यात आलेला असून आपले रेस्टॉरंट त्या कायद्याच्या कचाट्यात येत नाही, असे लोबो म्हणाले.

आपल्या रेस्टॉरंटच्या शेजारी हल्लीच उभारण्यात आलेल्या रेस्टॉरंटच्या चालक श्रीमती आरोरा या परप्रांतीय महिलेच्या तक्रारीवरून जीसीझेडएमएचे अधिकारी विनाकारण आपल्याला सतावत आहेत. आपल्या कुटुंबीयांच्या जीवितास धोका असल्याचेही श्रीमती जुआन लोबो यांनी यावेळी सांगितले.

मुख्यमंत्री डॉ. प्रमोद सावंत यांनी याप्रकरणात विशेष लक्ष घालून आपल्याला सुरक्षा आणि न्याय मिळवून द्यावा, असेही लोबो यांनी सांगितले.