कृपया वृद्ध चालकांचा आदर राखा, धीर धरा ' अशा 'ई' बोध चिन्हाचे अनावरण वाहतुकमंत्री माविन गुदिन्हो यांनी केले. रोटरी क्लब ऑफ मिरामार यांच्या पुढाकाराने, राज्य सरकारच्या सहकार्याने राज्यातील जेष्ठ वाहन चालविणांर्‍या चालकांसाठी 'ई' बोध चिन्ह तयार केले आहे. वृद्ध चालकांचा आदर करणे, त्यांचा सन्मान राखण्यासाठी इतर वाहनचालकांनी 'ई' बोध चिन्ह असलेल्या वाहनांचा आदर राखण्यासाठी पुढाकार घ्यावा असे आवाहन वाहतुक मंत्री माविन गुदिन्हो यांनी केले आहे.

नवेवाडे- दाबोळी येथील भाजप कार्यालयात रोटरी क्लब ऑफ मिरामार यांच्या सौजन्याने वाहन चालवणाऱ्या वृद्ध चालकांसाठी 'ई' बोध चिन्हाचे अनावरण मंत्री गुदिन्हो यांच्या उपस्थितीत करण्यात आले. यावेळी रोटरी क्लब ऑफ मिरामारच्या अध्यक्ष प्रिती शेट, लकी सिंग, भावना रायकर, श्रेयस लोटलीकर, दाबोळी भाजप गटाध्यक्ष संदीप सूद व इतर जेष्ठ नागरिक उपस्थित होते.

पुढे बोलताना मंत्री गुदिन्हो म्हणाले की, राज्यात वाहन चालवणाऱ्या वृद्ध चालकांनी आपल्या वाहनावर 'ई ' बोधचिन्ह लावावे. यामुळे मागून येणारे वाहन आपला अवश्य आदर राखेल. तसेच राज्यातील युवा वाहन चालकांनी 'ई' बोध चिन्ह असलेल्या वृद्ध चालकांना त्रास देऊ नये. रोटरी क्लब ऑफ मिरामार यांनी वृद्ध चालकांचा खऱ्या अर्थाने आदर राखला असून ते अभिनंदनास पात्र असल्याची माहिती वाहतुक मंत्री गुदिन्हो यांनी दिली.

राज्यातील ' विन्टेज वाहनांना' नवीन क्रमांक देण्याचा राज्य वाहतुक विभागाचा प्रयत्न आहे. यामुळे पुर्वीच्या वाहनांना रस्त्यावर धावण्याची पुन्हा संधी प्राप्त होईल. तसेच विन्टेज वाहनांमुळे पर्यटन क्षेत्राला देखिल बऱ्या पैकी लाभ होईल अशी माहिती मंत्री गुदिन्हो यांनी दिली.