National Sub-Junior Kabaddi Tournament: गोव्याच्या मुलींनी 33व्या राष्ट्रीय सबज्युनियर कबड्डी स्पर्धेत ब्राँझपदक मिळवले. उपांत्य फेरी गाठल्यानंतर हरियाणाकडून 24-31 असा सात गुणफरकाने पराभव पत्करावा लागला, त्यामुळे ब्राँझवर समाधान मानावे लागले. बिहारमधील पाटणा येथे झालेल्या या स्पर्धेत हरियाणाने राजस्थानला चुरशीच्या लढतीत 35-33 असे हरवून विजेतेपद पटकावले. राजस्थानला रौप्यपदक मिळाले.

दरम्यान, गोव्याच्या मुलींनी मंगळवारी रात्री उपांत्यपूर्व फेरीत उत्तर प्रदेशला 53-29 गुणफरकाने हरवून उपांत्य फेरी गाठली होती. त्यापूर्वी, उपउपांत्यपूर्व लढतीत गोव्याने तेलंगणास 53-28 असे हरवले होते. स्पर्धेच्या ‘ग’ गटसाखळी फेरीत तिन्ही सामने जिंकून अग्रस्थान मिळवताना गोव्याने अनुक्रमे पश्चिम बंगाल (44-16), केरळ (44-8), बिहार (47-16) या संघांवर मात केली होती. स्पर्धेत गोव्याच्या मुलींनी पाच विजय आणि एक पराभव अशी कामगिरी बजावली.