सांगे तालुक्यातील सार्वजनिक मंडळाने आगामी गणेशोत्सवानिमित्त 2BHK आणि 27 लाख रोख रक्कमेच्या पहिल्या बक्षिसांसह एक कोटी 46 लाख रुपयांच्या एकूण बक्षिसांची घोषणा केली. त्यानंतर आता केपे तालुक्यातील एका मंडळाने तब्बल वीस कार आणि त्यासोबत लाखोंची बक्षीसं जाहीर केलीयेत.

या सार्वजनिक मंडळाच्या तिकीट खरेदीसाठी मुसळधार पाऊस, थंडी, वाऱ्याची तमा न बाळगता नागरिकांनी शनिवारी (०३ ऑगस्ट) पहाटे तीनपासून गर्दी केली.

गोव्यातील एक सर्वात मोठा उत्सव म्हणून साजरा होणारा गणेशोत्सव जवळ आला आहे. घरगुती आणि सार्वजनिक स्तरावर साजऱ्या केल्या जाणाऱ्या या महोत्सवासाठी सर्वत्र लगबग सुरु झाली आहे. सार्वजनिक मंडळांनी गणेशोत्सवाच्या निमित्ताने लकी ड्रॉ सोडत ठेवली असून, याचे तिकीट घेण्यासाठी राज्याच्या विविध भागातील नागरिक गर्दी करत आहेत.

केपे तालुक्यातील सार्वजनिक गणेशोत्सव मंडळाच्या महाप्रसाद पावतीची विक्री शनिवारी (०३ ऑगस्ट) सकाळी आठ वाजता सुरु झाली. मात्र, या पावती खरेदीसाठी पहाटे तीन वाजल्यापासूनच नागरिकांनी गर्दी करायला सुरुवात केली. मुसळधार पाऊस सुरु असताना थंडी-वाऱ्याची तमा न बाळगता नागरिकांनी पावती खरेदीसाठी रांग लावल्याचे पाहायला मिळाले.

मंडळाने या पावतीला महाप्रसाद पावती असे नाव दिले असून, त्याची खरेदी किंमत पाचशे रुपये आहे. पावती खरेदीसाठी पैसे रोखीने घेतले जात असल्याने अनेक इच्छुकांनी एटीएममधून पैसे काढले, त्यामुळे परिसरातील एटीएममध्ये कॅश संपल्याचे आढळून आले.

पावती खरेदीसाठी मोठी रांग असल्याने गर्दी नियंत्रण करण्यासाठी पावती विक्रीस्थळी पोलिस बंदोबस्त देखील पाहायला मिळाला.

मंडळाच्या वतीने महागड्या वीस गाड्या आणि तब्बल एक कोटी ३२ लाख रुपये बक्षीस स्वरुपात दिले जाणार आहेत.