सांगे : गोवा फॉरवर्ड पक्षाचे युवा नेते मेशू डिकॉस्ता, दत्तराज गावस देसाई आणि सांगे पोलिसांत जोरदार शाब्दिक चकमक झाली. यावेळी उपनिरीक्षक कृष्णदास बोरकर यांनी मेशू यांचे वकील विराज नागेकर यांना ढकलल्याने सांगे पोलिस ठाण्यात तणावपूर्ण स्थिती निर्माण झाली.

दोन दिवसांपूर्वी गोवा फॉरवर्ड पक्षाचे गोवा राज्य युवा अध्यक्ष मेशू डिकॉस्ता यांनी सांगे येथील बांधकाम खात्याच्या कार्यालयात जाऊन नोंदूर्ले येथील पुलावर पडलेल्या खड्ड्यांविषयी जाब विचारण्याचा प्रयत्न केला असता, त्यावेळी कार्यालयात कोणीही अधिकारी उपस्थित नव्हते आणि कर्मचाऱ्यांनी उत्तर न दिल्याने अधिकाऱ्यांना कॉल केला असता ठोस उत्तर न दिल्याने त्यांनी कार्यालयाचा दरवाजा बंद केला.

याप्रकरणी ‘साबांखा’चे साहाय्यक अभियंता तौफिल यांनी, कार्यालयात बेकायदा प्रवेश केल्याप्रकरणी सांगे पोलिस ठाण्यात मेशूविरोधात तक्रार नोंद केली होती.

ज्यांनी मेशूविरोधात तक्रार दिली, त्यापैकी कोणीही हजर न राहता मेशूविरोधात तक्रार रजिस्टर केल्यामुळे आणखीनच गोंधळ निर्माण झाला. या गडबडीत उपनिरीक्षक कृष्णदास बोरकर यांनी मेशूचे वकील म्हणून हजर राहिलेल्या विराज नागेकर यांना ढकलल्याने तणावपूर्ण वातावरण निर्माण झाले.

यासंदर्भात मेशू यांनी सार्वजनिक बांधकाम खात्याचे मंत्री दिगंबर कामत यांच्याशी चर्चा केल्यानंतर दुसऱ्याच दिवशी खड्डे बुजविले. याचा अर्थ माझी मागणी रास्त होती.

समाजाच्या कामासाठी माझ्यावर कितीही खटले घातले, तरी मी मागे हटणार नाही. जनतेचा आवाज बनून चुकीच्या प्रत्येक गोष्टीवर बोलत राहणार असल्याचे मेशू यांनी स्पष्ट केले.

सरकारी कार्यालयात प्रवेश बेकायदा कसा?

मेशू यांनी जबानीत स्पष्टपणे उल्लेख केला आहे, की नोंदूर्ले पुलावरून जाणाऱ्या एका महिलेचा खड्ड्यात पडून गर्भपात झाल्यामुळे मी सार्वजनिक बांधकाम खात्याच्या कार्यालयात तक्रार नोंद करण्यासाठी गेलो असता, मी बेकायदेशीर प्रवेश केल्याची तक्रार पोलिसांत केली आहे. सार्वजनिक आणि सरकारी कार्यालयात प्रवेश करणे हा कधीपासून बेकायदेशीरपणा ठरतो, असा प्रतिप्रश्न त्यांनी केला आहे.