पणजी: गतमोसमात हैदराबाद एफसीने करारबद्ध केलेला युवा गोमंतकीय फुटबॉलपटू स्वीडन फर्नांडिस आगामी आय-लीग (Indian Super League) स्पर्धेत मणिपूरच्या नेरोका एफसीतर्फे खेळणार आहे. यासंदर्भात शनिवारी मणिपुरी संघाने हैदराबादच्या संघाशी एका मोसमाचा करार केला. (Goa footballer Sweden Fernandes will play for Manipur's Neroca FC.)

विंगर असलेला स्वीडन फर्नांडिस 21 वर्षांचा असून नेरोका एफसी संघात लोन पद्धतीनुसार दाखल होईल. 2020-21 मोसमात इंडियन सुपर लीग (Indian Super League) स्पर्धेत स्वीडन हैदराबाद संघात होता. आय-लीग स्पर्धेत नेरोका एफसीतर्फे खेळताना स्वीडनला महत्त्वपूर्ण स्पर्धात्मक अनुभव प्राप्त होईल आणि त्याला कौशल्य विकासाची संधी लाभेल, असे हैदराबाद एफसीला वाटत आहे.

यंदाची आय-लीग स्पर्धा जैवसुरक्षा वातावरणात कोलकाता येथे खेळणे अपेक्षित असून या स्पर्धेत एकूण 13 संघांचा समावेश असेल. आय-लीग स्पर्धेच्या कालावधीत हैदराबाद एफसी स्वीडनची कामगिरी व प्रगतीवर लक्ष ठेवून असेल.