दोन दिवसांनी चतुर्थी असल्याने बाजारपेठेत भेसळयुक्त आणि परवाना नसलेली उत्पादने उपलब्ध केली जात आहेत. यावर नियंत्रण ठेवण्यासाठी अन्न आणि औषध विभागातर्फे २० दिवसांपूर्वीपासून अचानक छापा टाकणे सुरू झाले आहे. गोव्यात अलीकडेच विभागातर्फे टाकण्यात आलेल्या छाप्यात सुमारे ३.१८ लाख रुपयांचे भेसळयुक्त खाद्यपदार्थ जप्त करण्यात आल्याची माहिती विभागातर्फे देण्यात आली आहे.

विभागातील अधिकाऱ्यांशी संपर्क साधला असता त्यांनी सांगितले की, उत्तर गोव्यात १६ ऑगस्ट रोजी टाकलेल्या छाप्यात बिस्कीट आणि मिठाई जप्त करण्यात आली. त्यांची किंमत सुमारे १८,००० रुपये होती. २७ ऑगस्ट रोजी टाकण्यात आलेल्या छाप्यात विनापरवाना फरसाण, शेंगदाणे आणि कच्चा माल विक्री करत असल्याचे आढळले. हे साहित्य सुमारे १ लाख रुपयांचे होते. २८ ऑगस्ट रोजी खजूर, मिठाई, बिस्किटे आणि दूध तसेच फरसाण हे विनापरवाना विकत असल्याने सुमारे १ लाख रुपयांचे साहित्य जप्त करण्यात विभागाला यश आले.

दरम्यान, विभागाला काही दुकाने आणि उत्पादन युनिट अस्वच्छ परिस्थितीत आढळली. काहींनी अन्न आणि औषध विभागाकडून व्यवसाय करण्याची परवानगीदेखील घेतली नव्हती.

किरकोळ दुकानांवरही छापा

दक्षिण गोव्यात छाप्यादरम्यान सुमारे १ लाख रुपयांचे साहित्य जप्त करण्यात आले आहे. यामध्ये फरसाण, किसलेले खोबरे, मिठाई आणि विनापरवाना उत्पादनांचा समावेश आहे. आंतरराज्य बसेसदेखील विभागाने तपासल्या आहेत. तसेच किरकोळ दुकाने आणि उत्पादन युनिटवरदेखील छापा टाकला.