मोरजी: सलग पडणाऱ्या धुवाधार पावसाने तिल्लारी धरणाने (Tillari Dam) धोक्याची पातळी ओलांडल्याने धरणातून अचानक सोडलेल्या पाण्यामुळे पेडणे (Pernem) तालुक्यातील नदी तीरावरील गावे पाण्याखाली आली असून अनेकांच्या घरात शापोरा नदीचे पाणी घुसले आहे. शापोरा नदी तीरावर असलेल्या आगरवाडा गावातील खालचा राऊत वाडा येथील गणेश कोंड ( गणपती विसर्जन स्थल) पूर्ण पणे पाण्याखाली गेली आहे यालाच लागून असलेल्या संतोष चोडणकर (Santosh Chodankar) यांच्या घरात नदीचे पाणी मोठ्याप्रमाणात शिरल्याने त्यांचे बरेच नुकसान झाले.

शापोरा नदीच्या तीरावर असलेली मिठागरे तसेच भात शेती पूर्णपणे पाण्याखाली गेली आहे त्यामुळे या भात शेतीला सध्या तलावाचे स्वरूप प्राप्त झाले असल्याची माहिती आगरवाडा चोपडे पंचायतीचे माजी सरपंच अमोल राऊत आणि शेतकरी नंदकुमार राऊत यांनी प्रस्तुत प्रतिनिधी पाशी बोलताना दिली.येथील भातशेती पाण्याखाली गेल्याने आमचे प्रचंड नुकसान होणार असल्याचे त्यांनी यावेळी सांगितले. यावेळी शेतकी खात्याच्या अधिकाऱ्यांनी दरवर्षी प्रमाणे यावर्षीही या पूरपरिस्थिती ची पाहणी केली आहे परंतु शेतकऱ्यांना नुकसान भरपाई मिळेल की. नाही याची शास्वती अजिबात नाही तरी या भागाचे आमदार दयानंद सोपटे यांनी शेतकऱ्यांना नुकसान भरपाई मिळवून द्यावी अशी या शेतकऱ्यांची मागणी आहे. शापोरा नदीच्या पाण्याच्या पातळीत वाढ झाल्याने आगरवाडा गणेश कोंड येथील संतोष चोडणकर यांच्या घरात घुसलेले नदीचे पाणी.