Karnataka's Trawlers seized: गोव्याच्या सागरी हद्दीत येऊन मासेमारी करणाऱ्या कर्नाटकच्या तीन ट्रॉलर्सना सोमवारी गोव्याच्या मासेमारी खात्याने पकडले. हे तिन्ही ट्रॉलर्स जप्त केले असून पणजी जेटीवर आणले आहेत. मच्छिमार मंत्री नीळकंठ हळर्णकर यांनी ही माहिती दिली. (Goa Fisheries Department)

हे ट्रॉलर्स मुळचे मालपे (कर्नाटक) येथील आहेत. त्यांनी पकडलेल्या सर्व मासळीचा लिलाव केला जाणार आहे. अधिकाऱ्यांना योग्य त्या कारवाईचे निर्देश दिले आहेत, असेही मंत्री हळर्णकर यांनी सांगितले.

राज्यात बेकायदेशीरीत्या एलईडी मासेमारी होत असल्याचे उघड झाल्यानंतर मच्छीमार खात्यावर जोरदार टीका झाली होती. त्यामुळे मच्छीमार खाते बऱ्यापैकी सक्रिय झाले असून बेकायदेशीर मासेमारी रोखण्यासाठी पावले उचलली जात आहेत.

दरम्यान, सर्व मच्छीमार जेटींवर सीसीटीव्ही कॅमेरे बसविले जाणार असल्याची माहिती काही दिवसांपुर्वी मंत्री निळकंठ हळर्णकर यांनी दिली होती.

राज्यात शाश्‍वत मासेमारीला चालना देण्याची गरज असून एलईडी मासेमारी कोणत्याही स्थितीत बंद होईल याची दक्षता घेणार आहे. यासाठी सीसीटीव्ही कॅमेरे महत्त्वाचे असून वास्को येथील खारीवाडा जेटीवर काम सुरु झाले आहे. राज्यातील इतर जेटींवरही लवकरच काम सुरू होणार आहे. एखाद्या जेटीवर एलईडी मासेमारी होत असल्याचे पुरावे मिळाल्यास त्या जेटीवरील मच्छीमार खात्याच्या अधिकाऱ्यावर कठोर कारवाई केली जाईल, असेही ते म्हणाले होते.