वास्को: 'गोवा फर्स्ट'(Goa First) या स्वयंसेवी संघटनेचे अध्यक्ष परशुराम सोनुर्लेकर (Parashuram Sonurlekar) यांनी मुरगाव (Murgaon) येथील देस्तेरो ब्यूझी बी स्कूल जवळ एका स्वस्त धान्य दुकानातून धान्याचा होणारा काळाबाजार उघड केला. तसेच याविषयी त्याने स्वस्त धान्य दुकान मालकाविरुद्ध नागरी पुरवठा खात्यात तक्रार दाखल केली आहे.

परशुराम सोनुर्लेकर यांनी दिलेल्या माहितीनुसार सकाळी 11 वाजता मुरगाव येथील देस्तेरो ब्यूझी बी स्कूल जवळ असलेल्या नागरी पुरवठा संस्थेच्या अंकुश रेडकर यांच्या स्वस्त धान्य दुकानातून एक दुचाकी चालक आपल्या दुचाकीवर पन्नास किलो वजनाचे दोन तांदळाच्या पिशव्या घालत असल्याचे दृष्टीपथास पडले. या कामी त्याला स्वतः मालक मदत करताना त्याला दिसले असता सोनुर्लेकर यांनी त्याचे व्हिडीओ चित्रण केले. नंतर दुचाकी चालकाने आपली दुचाकी चालू करून पुढे आला असता त्याला अडवून त्याच्याकडे चौकशी केली असता त्याने हे धान्य रेशन कार्ड शिवाय या स्वस्त धान्य दुकानातून काळा बाजारातून खरेदी केले असल्याचे सांगितले. दरम्यान या घटनेचा व्हिडीओ सोनुर्लेकर यांनी सोशल मीडियावर व्हायरल करून स्वस्त धान्य दुकानदार मुरगाव तालुक्यातील घाऊक विक्रेत्यांना अन्नधान्याची बेकायदेशीर विक्री करत असल्याचा पोल-खोल केला. तसेच याविषयी त्याने लेखी तक्रार देखील नागरी पुरवठा खात्याच्या कार्यालयात केली असून स्वस्त धान्य दुकान मालकावर कारवाई करण्यात यावी असे सांगितले. तसेच मुरगाव तालुक्यातील प्रत्येक स्वस्त धान्य दुकानातून महिन्याच्या २१ तारखेला किती साठा विक्रीस केला व किती बाकी आहे याचा अहवाल घेण्यात यावा असे सुचविले. कारण सदर दुकानदार महिन्याच्या 21 तारखेला दुकान बंद करून पुढचे दहा दिवस आपल्या दुकानातील धान्याचा काळाबाजार करण्यास व्यस्त असल्याचे सोनुर्लेकर म्हणाले. सरकार कडून हा धान्य कोटा गरीब जनतेसाठी उपलब्ध करून दिला जातो. मात्र सदर स्वस्त धान्य दुकानदार या धान्याचा काळाबाजार करून घाऊक विक्रेत्याना त्या धान्याची विक्री करुन जास्त पैसे वसूल करून घेतात. हा गरीब जनतेवर अन्याय असून सरकारने यावर त्वरित लक्ष घालावे, तसेच नागरी पुरवठा खात्याचे मंत्री गोविंद गावडे यांनीही यावर त्वरित लक्ष घालून असल्या बेजबाबदार काळाबाजार करणाऱ्या स्वस्त धान्य दुकान मालकावर कारवाई करावी असे सोनुर्लेकर यांनी शेवटी सांगितले.